Gísli Marteinn Baldursson var töluvert á milli tannanna á fólki fyrr á árinu þegar ljóst varð að hann væri að flytja til Edinborgar í Skotlandi til náms en hygðist samt halda áfram sem borgarfulltrúi Sjálfstæðisflokksins. Margir settu spurningarmerki við það hvernig Gísli gæti sinnt störfum sínum fyrir borgarbúa, verandi búsettur í öðru landi.

Ekki skal farið nánar út í það hér hvernig honum hefur farnast það, en Gísla hefur allavega gengið illa að blogga undanfarið. Ekki hefur birst stafkrókur á bloggsíðu borgarfulltrúans í tæpan mánuð. Síðast þegar Gísli bloggaði setti hann inn færslu tvo daga í röð en þá hafði einnig liðið mánuður frá síðustu skrifum kappans. Vonandi þýðir þetta að Gísli sé á útopnu við að láta gott af sér leiða í borgarmálunum og í náminu í landi karlmannspilsanna.