Raddir fólksins þagna á Austurvelli á laugardag. Þá hefjast mótmæli með öðrum hætti en samtökin Raddir fólksins hafa staðið fyrir undanfarna laugardaga. Í stað þess að fólk safnist saman og hlýði á ræður mælast fundarboðendur nú til þess að fólk líti til Alþingishússins, lúti höfði og hafi þögn í nákvæmlega 17 mínútur.

Í fréttatilkynningu sem Hörður Torfason, fundarstjóri mótmælafundanna á Austurvelli, sendi frá sér segir að kröfurnar séu þær sömu og fyrr: Núverandi stjórn Seðlabankans víki tafarlaust. Núverandi stjórn Fjármáleftirlitsins víki tafarlaust. Kosningar sem fyrst. Þá ítrekar hann að mótmælin og allar aðgerðir á vegum Radda fólksins séu alltaf friðsamlegar.