Mótmælendur eru farnir úr Seðlabankanum eftir að hafa náð samning við óeirðalögregluna. Þrír lögreglumenn eru eftir í anddyrinu en það var meðal annars ákvæði í samning milli lögreglunnar og mótmælenda. Mótmælendur öskra heimilisfang Davíðs Oddsonar og segja að stefnan sé tekin þangað.

Lögregla gaf viðvörun um að úða piparúða á fólkið ef það myndi ekki færa sig. Í hvert skipti sem lögreglan tók upp brúsana lyftu mótmælendur hendinni upp á táknrænan hátt eins og sést á meðfylgjandi mynd.

Búið var að fjölga lögreglumönnum við glerið í innganginum og segir blaðamaður sem er á staðnum að mikil hætta hefði getað skapast ef lögreglan hefði farið að úða piparúða á mótmælendurna því inngangurinn er þröngur og fólk gæti kramist undir.

Fólk söng: Ég veit um mann sem fer í taugarnar á mér, Davíð út, Davíð út.

Anddyrið hefur verið rýmt.

Viðbót: Ekkert varð úr fyrirhugaðri för mótmælenda að heimili seðlabankastjórans þegar allt kom til alls.