Hópur fólks ruddist inn í Seðlabankann nú fyrir stundu og hefur lögreglan hótað að beita táragasi samkvæmt blaðamanni DV sem er á vettvangi. Talið er að minnsta kosti 200 manns séu inni í bankanum en fólkið situr á ganginum í anddyrinu og ætlar hvergi að hreyfa sig.

Lögreglan hótar hinsvegar að beita táragasi fari fólkið ekki. Ekki er vitað hvort Davíð Oddsson sé inn í bankanum en fólkið vill að Davíð komi út. Sumir mótmælendanna eru í ágætum gír og syngja gamla Eurvision slagara og sjómannalög.

Víkingasveitin er fyrir innan mótmælendur og er í viðbragðsstöðu geri fólk sig líklegt til að brjótast inn í bankann. Geir Jón Þórisson yfirlögregluþjónn er kominn á vettvang og reynir hann að róa mannskapinn.