Stuðningur Íslendinga við Geir H. Haarde forsætisráðherra er jafnlítill og stuðningur bandarísku þjóðarinnar við George W. Bush forseta þegar hann mældist sem verstur hjá Gallup í lok september. Einungis 27,2 prósent aðspurðra í nýrri könnun Gallups segjast ánægð með Geir.

Þannig birti bandaríska Gallup sérstaka frétt um það þegar stuðningur við Bush féll niður í "sögulega lægð" 30. september síðastliðinn. Sú sögulega lægð var 27 prósent, eða sami stuðningur og er nú við Geir Haarde forsætisráðherra.

Nýjar kannanir af ánægju með störf Bush benda þó til þess að stuðningur við hann minnki enn meira en gefið var til kynna í Gallup-könnuninni.

Þó er Geir ekki nándar jafnóvinsæll og Árni M. Mathiesen fjármálaráðherra. Árni nýtur litlu meiri stuðnings en Frjálslyndi flokkurinn. Einungis 4,5 prósent Íslendinga eru ánægð með störf Árna.

Jóhanna Sigurðardóttir er langvinsælasti íslenski ráðherrann. Þrír af hverjum fjórum Íslendingar lýsa ánægju sinni með störf hennar. Næst á eftir kemur varaformaður Sjálfstæðisflokksins, Þorgerður Katrín Gunnarsdóttir, með um 40 prósent stuðning.

Könnun Gallup vekur einnig athygli í því tilliti að einungis 21 prósent kjósenda segjast myndu kjósa Sjálfstæðisflokkinn ef kosið yrði nú. Það er söguleg lægð flokksins. Vinstri grænir njóta mestra vinsælda, en 32 prósent hyggjast kjósa flokkinn. 31 prósent styður Samfylkinguna, en aðeins 8 prósent Framsóknarflokkinn.