Ríkisstjórnin þarf að gera meira til að bjarga þeim mikla fjölda heimila sem lenda í vandræðum vegna atvinnuleysis eða tekjulækkana. Þetta er mat Jóhannes Gunnarssonar, formanns Neytendasamtakanna, í grein sem hann skrifar á vef samtakanna.

„Þær aðgerðir sem stjórnvöld hafa fyrst og fremst gripið til er frysting á myntkörfulánum og greiðslujöfnun vegna verðtryggðra lána. Með báðum leiðum er dregið úr greiðslubyrði tímabundið og það sem eftir stendur leggst við höfuðstólinn. Því verður greiðslubyrðin þyngri seinna en heimilt er að lengja lánstímann, segir Jóhannes og bætir við að stjórnvöld hafi líka boðað ráðstafanir til að lækka dráttarvexti en enn sé beðið eftir raunverulegum aðgerðum.

„Höfum í huga að nú þegar greiðum við óheyrilega háa dráttarvexti sem bitna illilega á heimilum í vanskilum. En gleymum ekki að lækkun dráttarvaxta knýr vexti á ýmsum neyslulánum niður, þar á meðal yfirdráttarvexti og vexti vegna greiðsludreifinga og raðgreiðslna. Einnig hafa stjórnvöld tilkynnt um að þegar ný lög um innheimtustarfsemi taka gildi um áramót verður notuð heimild til að setja hámark á það gjald sem innheimtuaðilar geta krafist. Loks má nefna að milda á innheimtuaðgerðir.“

„Það er þó ljóst að þessar aðgerðir duga engan veginn til að bjarga þeim mikla fjölda heimila sem lenda í verulegum vandamálum vegna atvinnuleysis eða verulegrar lækkunar launa. Miðað við verðlagsþróun munu enn fleiri heimili lenda í vandamálum enda hefur vaninn við greiðslumat verið sá að tefla á tæpasta vað.“

Grein Jóhannesar