Bjarni Ármannsson, fyrrverandi bankastjóri Glitnis, náði góðum árangri í Amsterdam-maraþoninu á dögunum. Svo hratt hljóp hann að hann náði níunda besta tíma þeirra sem hlupu fyrir sömu þjóð. Bjarni hljóp hins vegar ekki sem Íslendingur, heldur Norðmaður.

Bjarni kláraði maraþonið á þremur klukkustundum og átján mínútum. Af tæplega sex þúsund keppendum varð hann númer 731. Hér sést myndskeið úr maraþoninu, en þar tekur Bjarni framúr tveimur á endasprettinum með gráa derhúfu og í grænum bol.
Hér má sjá listann yfir Norðmennina sem kepptu í maraþoninu og árangur þeirra.

Bjarni fékk væna fúlgu þegar hann yfirgaf Glitni í maí í fyrra. Hann fékk um það bil 100 milljónir króna í starfslokasamning, auk þess sem honum hlotnaðist ríflega 380 milljóna króna hagnaður í krafti forkaupsréttar á hlutabréfum.

Þann 11. september sama árs var tilkynnt að Bjarni hefði tekið við stjórnarformennsku í orkuútrásarfélaginu Reykjavík Energy Invest. Eftir að REI var kæft í fæðingu vegna skorts á lýðræðislegum vinnubrögðum af hálfu borgarstjórnar Sjálfstæðisflokks og Framsóknarflokks fór Bjarni til Noregs, þar sem hann býr nú ásamt fjölskyldu sinni.

Undanfarið hafa leiðtogar í íslensku stjórnmálalífi skorað á auðuga landa sína að snúa heim með auð sinn til að taka þátt í endurreisn efnahagslífsins. Ekki er ljóst hvort Bjarni svarar kallinu, en bæði Jón Ólafsson og Hannes Smárason hafa lýst yfir vilja til að taka þátt í íslensku endurreisninni.