„Hann bankaði í öxlina á mér. Við erum nú svo góðir félagar við Steingrímur að ég kippi mér ekki upp við það,“ sagði Geir H. Haarde forsætisráðherra við blaðamenn að loknum ríkisstjórnarfundi í morgun.

Þeir sem horfðu á umræður um vantrausttillögu á ríkisstjórnina í gær veittu því eflaust athygli að Steingrímur J. Sigfússon, formaður Vinstri grænna, virtist ýta við Geir H. Haarde þar sem hann sat í sætinu sínu.

Björn Bjarnason var þá í pontu og sakaði Steingrím um að standa í vegi fyrir því að nefnd verði skipuð til að rannsaka bankahrunið. Steingrímur sakaði Björn um að fara með þvætting og sagði: Étt‘ann sjálfur! Að því búnu gekk hann að Geir og virtist ýta í hann.

Aðspurður hvað Steingrími hafi gengið til segir Geir: „Hann reiddist Birni Bjarnasyni. Það fór nú ekki framhjá neinum. Það er ekkert stórmál.“ Geir vildi þó ekki segja blaðamönnum hvað hafi farið þeim á milli þegar Steingrímur gekk að honum: „Það ætla ég ekki að segja ykkur,“ sagði Geir og skellti upp úr.

Hægt er að sjá upptöku af atvikinu hér