Eva Hauksdóttir, móðir Hauks Hilmarssonar, mótmælandans sem lögreglan handtók skyndilega í gærkvöldi, var gösuð af lögreglu í átökunum við lögreglustöðina í Hverfisgötu fyrir skemmstu. Samkvæmt heimildum DV var hún flutt á slysadeild.

Eva hélt tilfinningaþrungna ræðu áður en allt sauð upp úr meðal hundruða mótmælenda við lögreglustöðina. Ástæða uppþotana var að Haukur var handtekinn skyndilega af lögreglu og látinn afplána tveggja vikna dóm vegna mótmæla frá árinu 2005, sem Eva segir að hann hafi þegar afplánað, en verið sleppt vegna plássleysis.

Mótmælendurnir eru ekki í nokkrum vafa um að handtaka og skyndiafplánun Hauks sé vegna þess að hann dró Bónus-fána að húni á þaki Alþingishússins í mótælum fyrir tveimur vikum.

Mikill mannsfjöldi er enn við lögreglustöðina. Mótmælendurnir standa andspænis óeirðabúnum lögreglumönnum og grýta þá eggjum. "Út með Hauk, inn með Geir!" kallar mannfjöldinn.

Fjöldi manns hefur orðið fyrir piparúða lögreglu, og skemmdirnar á lögreglustöðinni eru töluverðar. Rúður hafa verið brotnar og mótmælendurnir brutu upp útihurð að anddyri lögreglustöðvarinnar.

Eins og fyrr segir hafa mótmælendur ekki látið staðar numið þrátt fyrir að hafa orðið fyrir piparúða lögreglumanna.