Lögreglan hefur leyst Hauk Hilmarsson mótmælanda úr haldi. Mörg hundruð manns gerðu áhlaup á lögreglustöðina seinni partinn í dag vegna skyndilegrar handtöku hans.

Haukur endurheimti frelsi sitt eftir að óþekktur maður borgaði sekt hans, sem var grundvöllur handtökunnar. Eftir að hann gekk út úr lögreglustöðinni frjáls maður sagðist hann skilja reiði fólksins. ,,Ég vil að það verði barist fyrir byltingu en ekki fyrir mig," sagði Haukur við DV. Mótmælandinn var fangelsaður fyrir að hengja bónusfána á Alþingishúsið. Hauki var sleppt var fyrir hálftíma síðan eftir að velgjörðarmaður hafði borgað hann út. Honum var haldið í klefa sínum utan tvo klukkutíma sem hann fékk að fara út.,
Gríðarleg fagnaðarlæti brutust út þegar honum var sleppt. Hauykur kallaði yfir hópinn. ,,Ég vil að við nýtum alla þessa orku tikl að fella ríkisstjórnina strax. Hann sagðist hafa haft efasemdir um að samþykkja að óþekkti aðilinn greiddi sekt hans, sem kom til vegna þess að hann mótmælti virkjunum árið 2005. Handtaka hans hefur hins vegar verið sett í samhengi við þann táknrænan gjörning hans að draga fána Bónus-verslunarkeðjunnar að húni á þaki Alþingishússins, þar sem þjóðfáni Íslendinga blaktir öllu jafnan.

Uppþotin hafa sjatnað eftir lausn Hauks, en þó er ljóst að handtaka hans er aðeins toppurinn á ísjakanum þegar kemur að þeirri reiði sem kraumar í mótmælendunum. Önnur krafa þeirra var að Geir Haarde forsætisráðherra yrði settur í klefann í stað Hauks, en ljóst er að ekki verður orðið við þeirri kröfu.

Eftir stendur að fjöldi mótmælendanna eru sárir, eftir að sérsveit lögreglunnar sprautaði piparúða yfir mannfjöldann. Meðal þeirra sem urðu fyrir gasinu eru börn og unglingar, sem og móðir Hauks.