Fyrrum aðalaritari Sameinuðu Þjóðanna, Kofi Annan, og fyrrverandi forseti Bandaríkjanna, Jimmy Carter, hafa neyðst til að hætta við áformaða heimsókn sína til Simbabve þar sem ríkisstjórn landsins neitaði þeim um vegabréfsáritun.

Ætluðu Carter og Annan að halda til Simbabve á fund eiginkonu Nelson Mandela, Graca Machel. Yfirvöld í Simbabve neita því að hafa sett þeim félögum stólinn fyrir dyrnar.

„Við urðum að hætta við fyrirhugaða heimsókn þar sem ríkisstjórnin lýsti því yfir að hún myndi ekki vera samvinnuþýð í þessu máli,“ sagði Annan á blaðamannafundi í Jóhannesarborg eftir að ljóst var að ekkert yrði úr ferðinni.

Annan, Carter og Machel skipa saman hóp sem kallast the Elders, eða öldungarnir, sem fjalla um hin ýmsu átakamál í heiminum. Þau munu þess í stað hittast í Suður-Afríku til að ræða málefni Simbave, en Robert Mugabe forseti landsins hefur verið gagnrýndur harðlega af mannréttindasamtökum sem segja helming íbúa landsins standa frammi fyrir hungursneyð í upphafi næsta árs.