Pókersamband Íslands mun á morgun standa fyrir pókermóti fyrir félagsmenn sína á veitingastaðnum Gullöldin í Grafarvogi. Mun það kosta félagsmenn fimm þúsund krónur að taka þátt og verða vinningar í formi peningaverðlauna sem þátttakendur leggja til með aðgangseyri auk þess sem Pókersambandið mun leggja til viðbótarvinningsfé að upphæð 25 þúsund krónur.

Sveinn Andri Sveinsson, lögfræðingur og talsmaður sambandsins, verður á staðnum ef til afskipta lögreglu kemur. Eins og mikið var fjallað um fyrir rúmu ári síðan stöðvaði lögreglan pókermót Sindra Lúðvíkssonar og gerði allan varning mótsins upptækan.

Í samtali við Fréttablaðið á dögunum sagðist Sveinn Andri ekki hafa neina trú á því að slíkt myndi henda að þessu sinni.