Troðfullt hús var á veitingastaðnum NASA í kvöld þar sem almenningur kom saman til að fjalla um kreppuna og hlutverk fjölmiðla í nútíð og þátíð. Mikill hiti var í fundarmnönnum sem einróma vildu að ríkisstjórnin axlaði ábyrgð og viki frá völdum og sömuleiðis Davíð Oddsson seðlabankastjóri. Þungt var í mörgum þeirra sem tóku til máls og líkti einn framsögumanna efnahagsslysinu við manndráp af gáleysi. Fjölmiðlar fengu ýmsar átölur í bland við hrós. Allt að þúsund manns voru mættir til að taka þátt í borgarafundinum. Öllum alþingismönnum var boðið en einungis tveir sáu sér fært að mæta, þeir Árni Árnason frá Samfylkingu og Guðjón A. Kristjánsson, formaður Frjálslynda flokksins. Aðir héldu sig fjarri fundinum.