Íslendingar taka lán hjá Evrópuþjóðum til að borga lágmarkstryggingar til handa innistæðueigendum hjá Icesave. Þetta var kynnt á blaðamannafundi í Ráðherrabústaðnum laust fyrir sex. Samkomulagið felur í sér að ríkissjóður Íslands ábyrgist greiðslur umfram þær upphæðir sem er að finna í sjóðum Icesave og Landsbankans.

Þetta samkomulag var forsenda þess að gengið yrði frá lánveitingu Alþjóða gjaldeyrissjóðsins til Íslands. Engar upplýsingar fengust um það á blaðamannafundinum í Ráðherrabústaðnum um hversu háa fjárhæð væri að ræða. Rætt hefur verið að sú upphæð geti numið 600 milljörðum króna en vonir standa til að eignir Landsbankans dugi til að standa undir hluta þess kostnaðar.