Lögreglan á Suðurnesjum handtók tvo ökumenn um helgina vegna gruns um akstur undir áhrifum fíkniefna. Þá stóð lögreglan þjóf að verki fyrir helgi en maðurinn var handtekinn fyrir utan fjölbýlishús á Vallarheiði, gömlu herstöðinni á Keflavíkurflugvelli.

Lögreglan fékk tilkynningu um að þjófavarnarkerfi hússins væri í gangi og þegar laganna verðir mættu á vettvang sáu þeir hvar maður kom út úr húsinu með lyftingarlóð. Við nánari skoðun á húsinu kom í ljós að búið var að valda nokkrum skemmdum innandyra og tæma úr slökkvitæki.