Samkomulag hefur tekist milli íslenskra stjórnvalda og ESB-ríkja þar sem stjórnvöld ábyrgjast þá lágmarkstryggingu sem EES reglur mæla fyrir um til innistæðueigenda í útibúum bankanna erlendis. Endanlegur kostnaður ríkissjóðs vegna þessa mun ráðast af því hvað greiðist upp í innistæðutryggingar af eignum bankanna. Einnig er kveðið á um að Evrópusambandið undir forystu Frakklands taki áframhaldandi þátt í að finna lausnir sem gera Íslandi kleift að endurreisa fjármálakerfi og efnahag.

Aðilar eru ásáttir um að hraða fjárhagslegri aðstoð við Ísland, þar með talið samþykkt lánafyrirgreiðslu sem beðið hefur samþykktar stjórnar Alþjóðagjaldeyrissjóðsins undanfarnar vikur. Erindi Íslands verður tekið fyrir næstkomandi miðvikdudag í stjórn sjóðsins.