Indónesísk yfirvöld hafa afturkallað viðvörun sem þau gáfu út um hættu á flóðbylgjum eftir öflugan neðansjávarjarðskjálfta undan ströndum Sulawesi-eyjar í austanverðri Indónesíu. Þrátt fyrir að jarðskjálftinn hafi verið gríðarlega öflugur virðast skemmdir af hans völdum vera litlar.

Jarðskjálftinn mældist 7,5 á Richterkvarða, það er minna en talið var upphaflega þegar styrkur hans var áætlaður 7,7 á sama kvarða. Neðansjávarskjálftar á þessum slóðum kalla á mikil viðbrögð, sérstaklega vegna þess að fólk er minnugt hamfaranna á annan í jólum árið 2005. Þá reið yfir jarðskjálfti upp á 9,0 á Richterkvarða. Hann hratt af stað flóðbylgju sem gekk á land víða við Indlandshaf og kostaði 230 þúsund manns lífið.