Tvöhundruð ára gömul kirkja skammt frá þorpinu Komarovo í Rússlandi er horfin. Kirkjan, sem var byggð 1809, var til staðar, ósnert, í júlí, en einhvern tímann í október var hún horfin af yfirborði jarðar.

Múrstein fyrir múrstein höfðu þjófar fjarlægt kirkjuna og ekki komst upp um athæfið fyrr en einhverju síðar. Kirkjan var ekki í alfaraleið og ekki í notkun, en embættismenn kirkjunnar höfðu íhugað að endurvekja guðsþjónustur í henni.

Það er ekki nýtt að þjófar beini spjótum sínum að kirkjum í dreifbýli Rússlands, enda hægt að fá gott verð fyrir íkona auk þess sem hægt er að selja efnivið kirknanna sem byggingarefni.