Ættingjar manns sem lést fyrir skömmu fá ekki aðgang að tölvupósti hans. Ættingjarnir höfðu óskað eftir aðgangi að tölvupósti mannsins hjá stofnun þar sem hann hafði tölvupóstfang.

Málinu var skotið til Persónuverndar til að skera úr um hvort ættingjarnir fengju aðgang að tölvupóstinum. Tölvupóstfangið er á vegum stofnunar á sviði fjarskiptamála og þó ljóst þætti að þar væri aðeins einkapóstur en enginn vinnupóstur úrskurðaði Persónuvernd að ættingjarnir skyldu ekki fá aðgang að tölvupóstinum. Slíkur aðgangur er óheimill þeim sem ekki tengjast starfsemi þess sem vistaði tölvupóstinn.