„Við mótmæltum fyrir þremur vikum síðan og aftur núna, við ætlum að vera aftur næsta laugardag,“ segir Guðrún Þórsdóttir mótmælandi á Akureyri. Um fimm hundruð manns létu sjá sig á Ráðhústorginu á Akureyri í gær á sama tíma og fólk mótmælti á Austurvelli í Reykjavík.

Að sögn Guðrúnar var tilgangurinn með göngunni að bæjarbúar sýndu samstöðu og samhug og létu rödd sína heyrast. Talsmenn göngunnar lögðu áherslu á um óflokkspólitíska uppákomu að ræða, aðeins andsvar við því hvernig komið er fyrir íslensku samfélagi. Einnig var verið að sýna samstöðu með friðsælum mótmælum í Reykjavík.

Ræðumenn mótmælanna voru: Valgerður H. Bjarnadóttir, Hlynur Hallsson, Helgi Vilberg, Óðinn Svan Geirsson, Georg Hollanders og Guðmundur Beck.

„Það mættu hundrað manns síðara laugardag, fimm hundruð í gær og við stefnum á þúsund næsta laugardag,“ segir Guðrún að lokum.