Karen Hrund er sextán ára móðir

Vinsæl á Snapchat - Segist áreitt af þrítugri konu - Finnur fyrir fordómum

Var fimmtán ára þegar hún varð ólétt að syni sínum Adrían. Hún fann fyrir miklum fordómum. Hún byrjaði að snappa til að ræða um fordómana.
Karen Hrund Var fimmtán ára þegar hún varð ólétt að syni sínum Adrían. Hún fann fyrir miklum fordómum. Hún byrjaði að snappa til að ræða um fordómana.

Karen Hrund var fimmtán ára þegar hún varð ólétt. Í dag er sonur hennar, Adrían, fjögurra mánaða gamall. Karen er í sambandi með barnsföður sínum, Ómari Berg. Ómar er 21 árs og hafa þau verið saman síðan Karen var fjórtán ára. Karen fann fyrir miklum fordómum þegar hún varð ólétt vegna aldurs hennar. Hún ákvað að byrja að snappa til að ræða um fordóma. Nú fylgjast yfir tíu þúsund manns með daglegu lífi Karenar sem ungrar móður á Snapchat. En frægðin hefur sína galla. Karen segir fullorðna konu hafa staðið í hótunum við hana og talað illa um hana við fyrirtæki og aðra snappara.

„Ég hef talað við rosalega marga sem hafa einnig lent í henni. Ég þekki hana varla og veit ekki hvað ég á að hafa gert henni. Hún er að eyðileggja mannorð mitt,“ segir Karen.

Í einlægu viðtali ræðir Karen um hvernig er að vera ung móðir, fordómana sem hún finnur fyrir og deilur við annan snappara.

Fær mikinn stuðning

Hvernig hafa síðustu fjórir mánuðir verið?

„Við erum mjög heppin.“

„Mjög upp og niður. Maður getur aldrei ímyndað sér fyrir fæðingu hvernig þetta verður. Þetta hefur verið erfitt en Adrían er mjög gott barn. Við erum mjög heppin. Hann sefur á næturnar, grætur lítið, tekur pela og snuð. Það er ekkert að hjá honum.“

Karen Hrund og Adrían búa hjá móður Karenar. Ómar býr rétt fyrir utan Akureyri en er oft hjá þeim og öfugt. „Ég hefði örugglega aldrei búist við þessu fyrir rúmlega ári, en þetta gengur vel. Ég er að standa mig betur í þessu en ég myndi standa mig í námi ef ég væri í skóla núna.“

Fáið þið mikinn stuðning frá fjölskyldu ykkar?

„Já. Í byrjun þurfti ég sérstaklega á því að halda. Upp á síðkastið hef ég verið mjög mikið með Adrían og verið að bæta upp tímann í byrjun, en þá fór ég mjög oft út að hitta vini mína. Þar sem ég er svona ung fann ég fyrir svo mikilli þörf eftir fæðinguna að fara út og skemmta mér. Líka til að jafna mig eftir meðgönguna. Ómar var mikið með hann, mamma mín eða mamma Ómars. Það var mjög fínt en núna er ég byrjuð að vera mikið ein með Adrían og það gengur mjög vel. Ég veit alveg að ég þurfti á því að halda í byrjun að fara út og hitta vini svo líðan mín væri góð. Amma mín og afi hafa hjálpað okkur mikið líka,“ segir Karen og bætir við að Ómar hafi staðið sig rosalega vel.

Fæðingarþunglyndi

Karen grunar að hún þjáist af fæðingarþunglyndi. „Ég hef ekki leitað mér hjálpar eða fengið greiningu. En ég held ég sé með fæðingarþunglyndi. Ég er undir svo miklu áreiti.“

Áreitið segir Karen aðallega koma frá samfélagsmiðlum eins og Snapchat. Karen Hrund er mjög vinsæl á Snapchat, undir nafninu @KarenHrund, og fylgjast yfir tíu þúsund manns með henni daglega. Þegar hún var ólétt fylgdust tæplega fimmtán þúsund manns með henni daglega.

„Ég er ekki að snappa eins mikið og ég gerði áður fyrr, enda hefur fylgjendafjöldinn verið í takt við það. Ég tek fleiri pásur núna og er ekki allan daginn að snappa. Þetta getur verið mjög erfið vinna. Það þarf allt að vera svo skipulagt á snappinu. Eins og ef ég segist ætla að koma inn klukkan tíu þá þarf ég að gera það þótt Adrían sé grátandi. Það er frekar böggandi. En ég læt mig hafa þetta,“ segir Karen.

„Ég fæ oft ljót skilaboð frá fólki en oftast er það frá gerviaðgöngum á Snapchat, frá fólki sem þorir ekki að segja þessa hluti við mig undir nafni. Ég tek lítið mark á þeim skilaboðum.“

Byrjaði að snappa út af fordómum

Karen Hrund, Ómar Berg og sonur þeirra Adrían. Karen segir Adrían vera mjög gott barn og þau séu mjög heppin með hann.
Fjölskyldan Karen Hrund, Ómar Berg og sonur þeirra Adrían. Karen segir Adrían vera mjög gott barn og þau séu mjög heppin með hann.

„Ástæðan fyrir því að ég byrjaði að snappa voru fordómar sem ég var að finna fyrir,“ segir Karen og heldur áfram:

„Fordómarnir eru vegna þess að ég er ung og á barn. Ég hef fengið að heyra „oj, þú ert ógeðsleg að eiga barn“ og fengið alls konar skilaboð sem fólk myndi ekki senda til dæmis þrítugri móður. Fólk telur sig hafa skotleyfi á mig og geta sagt hvað sem er því ég er svo ung. Það passar sig enginn á því hvað hann segir á Snapchat. Fólk lætur allt vaða, það er ótrúlegt. Mér myndi ekki detta í hug að senda neinum þau skilaboð sem ég fæ.“

Karen segist líka hafa upplifað fordóma vegna aldursmunar hennar og Ómars. „Ég hef fundið fyrir rosalega miklum fordómum vegna aldurs okkar. Ég tók einmitt umræðu um það einu sinni á Snapchat og fékk í kjölfarið fjölda skilaboða frá fólki sem sagði að það væri mikill aldursmunur á milli þeirra og maka þeirra.“

Aðspurð hvort hún finni fyrir einhverjum aldursmun svarar hún því neitandi.

„Við hugsum aldrei út í aldursmun okkar. Okkur líður eins og við séum á sömu bylgjulengd.“

Segir annan snappara hafa gert sér lífið leitt

Rétt fyrir jól var mikið rætt um meint rifrildi milli Karenar og annars snappara á samfélagsmiðlum. Karen tjáði sig um málið á Snapchat á þeim tíma. Karen vill ekki nafngreina snapparann, sem hún segir hafi hótað sér bæði ofbeldi og lögsókn.

„Þetta byrjaði allt á því að þessi kona hafði samband við mig þegar ég var ólétt og komin með ágætis fylgjendahóp á Snapchat. Konan er yfir þrítugt og er sjálf að snappa. Hún sagðist vilja gefa mér pakka og spurði hvort ég væri til í að hitta hana. Ég svaraði því játandi, alltaf gaman að hitta aðra snappara,“ segir Karen og heldur áfram: „Hún virkaði mjög vel á mig í byrjun. Ég tók samt eftir því að það var eitthvað bogið við hana, en pældi ekkert meira í því. Hún sagði að maðurinn sinn væri á sjó og gæti mögulega reddað Ómar vinnu. Hún var í rauninni bara að sleikja mig upp því ég var orðin svo vinsæl. Á þessum tíma var ég með tæpa fimmtán þúsund fylgjendur og hún sagði mér að hún væri með tíu þúsund, sem ég veit ekkert hvort hafi verið satt.

Eftir þetta byrjaði hún að tala mikið við mig og bað mig reglulega um að hitta sig. Á svipuðum tíma byrjar vinkona mín að blogga hjá henni. Þær verða mjög nánar. Ég vil taka það fram að vinkona mín er tveimur eða þremur árum eldri en ég og þessi kona yfir þrítugt. Það segir kannski eitthvað um þroska hennar, að hún sé að sækjast í mikið yngri stelpur til að tala við og hanga með. Þessi vinkona mín sagði mér að konan væri alltaf að tala um mig og væri með mig á heilanum.“

Rifrildið sjálft

Karen segir að rekja megi upphaf deilna þeirra til færslu á Beauty Tips „Í færslunni voru stelpur að tala illa um ungar mæður. Ég skrifaði við færsluna að aldur væri aðeins tala og þroski skipti miklu máli. Ég sagði að ég vissi um mæður sem væru eldri en ég en kannski ekki eins hæfar. Þá varð þessi kona alveg brjáluð og hélt að ég væri að tala um sig. En ég var að verja mig sjálfa við því sem var sagt á þessum þræði.“

Að sögn Karenar átti rifrildið sér stað áður en hún á að eiga. „Eftir að Adrían fæðist hafði hún skyndilega samband við mig. Hún baðst afsökunar á rifrildinu og vildi koma með pakka til mín. Ég ákvað að taka afsökunarbeiðninni. Hún kom til mín og eyddi öllum tímanum í að tala illa um vinkonu mína og sagðist langa að senda fólk til að berja vinkonu mína. En vinkona mín, sem þá var sautján ára, hafði hætt að blogga hjá henni og þess vegna langaði konunni að láta berja hana,“ segir Karen og heldur áfram.

„Ég komst síðan að því að hún hafi verið að segja sömu hluti um mig, að hún ætlaði að senda fólk að berja mig og Ómar. Ég komst einnig að því að hún væri að segja við fólk að Ómar væri ekki faðir Adríans, að við værum í dópi og alls konar bull. Ég þekki þessa konu varla og ég skil ekkert hvaðan allt þetta kemur. Mér var sagt að hún væri stöðugt að tala um mig, við aðra snappara og fyrirtæki.“

Karen segist hafa heyrt frá mörgum einstaklingum hvað konan hafi verið að segja um hana.

„Ég hef það frá nokkrum öruggum heimildum að hún hefur verið að hvetja fyrirtæki til að fara ekki í samstarf með mér og hefur farið og heimsótt fyrirtæki til að tala illa um mig. Ég hef líka talað við fólk sem þekkir hana vel og segja að deilurnar milli mín og hennar séu ekki einsdæmi. Það hefur sagt mér að hún sé reglulega að gera öðrum snöppurum og bloggurum lífið leitt,“ segir Karen og bætir við að hún hafi fengið skilaboð frá yfir 50 manns sem segjast líka hafa „lent í konunni.“

Karen segist ekki vilja standa í deilum við konuna og hafi fyrst um sinn ekki ætlað að gera neitt í málinu. Hún hafi þó ákveðið að tjá sig um málið til að bjarga mannorði sínu. „Ég er bara sextán ára, ég skil ekki af hverju þessi þrítuga kona er að gera mér þetta. Ég vil að ég, Ómar og sonur minn séum látin í friði.“

Er nýorðinn fjögurra mánaða gamall. „Maður getur aldrei ímyndað sér fyrir fæðingu hvernig þetta verður,“ segir Karen.
Adrían Er nýorðinn fjögurra mánaða gamall. „Maður getur aldrei ímyndað sér fyrir fæðingu hvernig þetta verður,“ segir Karen.

Sautján ára umboðsmann

Umboðsmaður Karenar er sautján ára áhrifavaldurinn Patrekur Jaime. Fjöldi fólks fylgist með Patrek á Snapchat undir nafninu @Patrekur00.

Hvað kom til að þú ákvaðst að fá þér umboðsmann?

„Patrekur er mjög klár í þessu og þetta er það sem hann vill gera. Hann er snjall í viðskiptum og klár með peninga. Hann er líka einn af bestu vinum mínum. Hann er tiltölulega nýorðinn umboðsmaður minn en hefur reynst mér mjög vel. Eins og þegar málið kom upp með hinn snapparann þá hringdi Patrekur strax í lögfræðing til að athuga hvort hann gæti lögsótt mig.“

Bjóst ekki við viðbrögðunum

„Ég bjóst ekki við því að fá svona marga fylgjendur þegar ég byrjaði að snappa. Ég hef fengið alls konar skilaboð frá fylgjendum mínum, um hvað ég sé dugleg og hugrökk. Ég hef líka fengið skilaboð frá stelpu sem sagðist hafa verið ólétt en farið í fóstureyðingu því hún þorði ekki að eiga barnið út af fordómum. Þá vissi ég hvað ég væri að opna á mikilvæga umræðu.

Aftur á móti hef ég einnig fengið skilaboð frá ungum stúlkum sem segjast ætla að verða óléttar alveg eins og ég. Ég er alls ekki að hvetja til þess að unglingsstúlkur verði óléttar. Í mínu tilviki varð ég óvart ólétt og við unnum úr aðstæðunum á þennan hátt.

Ég er rosalega þakklát öllum sem hafa fært okkur gjafir, bæði fjölskylda og ókunnugt fólk. Ég vil þakka fyrirtækjum fyrir gott samstarf. Fjölskylda mín og vinir hafa verið mikið til staðar og hefur stuðningur þeirra verið ómetanlegur.“

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.