Á síðasta ári settu hjónin George og Amal Clooney á laggirnar stofnun sem nefnist The Clooney Foundation of Justice. Nýlega sendu þau frá sér tilkynningu um að stofnunin muni í samvinnu við UNICEF og Google opna sjö skóla í Líbanon fyrir rúmlega 3.000 sýrlensk börn flóttamanna, sem ekki hafa fengið að njóta menntunar. Hjónin segja að þau vilji ekki að börnin verði týnd kynslóð sem fái ekki að njóta menntunar. „Við viljum ekki glata heilli kynslóð vegna þess að hún var svo óheppin að fæðast á röngum stað á röngum tíma,“ segja þau. Hjónin hafa bæði látið sig mál flóttamanna miklu varða en Amal er virtur mannréttindalögfræðingur.
Hjónin eru eins og kunnugt er stoltir foreldrar tvíburanna Alexanders og Ellu sem nú eru tveggja mánaða. Franskt tímarit birti nýlega mynd af hjónunum þar sem þau héldu á börnum sínum. Ljósmyndari hafði klifrað upp í tré við heimili hjónanna og tók mynd með aðdráttarlinsu. George Clooney er æfur og ætlar í mál við blaðið.