Haustverk í sveitinni gætu komið í veg fyrir að foreldrar Tryggva Snæs komist út
Tryggvi Snær Hlinason, hávaxni bóndasonurinn úr Bárðardalnum, hafði aldrei æft körfubolta fyrir tæpum fjórum árum og kunni varla reglurnar. Það kom þó ekki í veg fyrir að hann færi með U-20 ára landslið Íslands á herðunum í átta liða úrslit Evrópukeppninnar í sumar og væri valinn í úrvalslið mótsins. Í kjölfarið skrifaði hann undir atvinnumannasamning við Spánarmeistara Valencia og er nú á leiðinni í lokakeppni Evrópumótsins í Finnlandi, sem hefst á fimmtudaginn. Hljómar ótrúlega en er satt.
Tryggvi er alinn upp í Svartárkoti í Bárðardal, fallegasta stað á landinu að hans sögn. Svartárkot er innsti bær í dalnum, í um 400 metra hæð yfir sjávarmáli, og langur vegur að fara í næsta þéttbýli. „Fjölskyldan mín býr þar með um 450 vetrarfóðraðar kindur en stundar alls konar aðra vinnu samhliða búskapnum. Fyrir utan þessi hefðbundnu sveitastörf rekur fjölskyldan mín gistiheimili í dalnum, Kiðagil, og svo tínist ýmislegt til, önnur ferðaþjónusta og þjónusta við rannsóknir til dæmis.“
Tímasetning Evrópumótsins er afleit fyrir ættingja Tryggva hvað varðar að þeir geti komist út til að fylgjast með en sauðfjárbændurnir foreldrar hans verða á fullu í haustverkum, smalamennsku og fjárragi. „Þetta er afleitur tími. Þau eru búin veltast yfir þessu heillengi og eru í algjöru basli með að velja. Ég veit ekki hvort þau komast og ég skil það fullkomlega ef þau geta það ekki. Aðra helgina í mótinu, 9. til 10. september, eru fyrstu göngur í Svarfaðardal þaðan sem pabbi er ættaður og hefur smalað í áratugi. Það er það eina sem hann missir aldrei af og hann er í tómum vandræðum karlinn, skiljanlega.“