Íslenska karla­landsliðið í körfuknatt­leik hélt í morgun til Finn­lands þar sem það mun leika á Evr­ópu­mót­inu. Fyrsti leik­ur liðsins er gegn Grikklandi í Hels­inki á fimmtu­dag, kl. 13:30 að ís­lensk­um tíma. Um helgina var frumsýnt nýtt myndband þar sem landsliðið þakkar þeim sem fyrst og fremst hafa stutt þá, mæðrum sínum.

„Mesti heiðurinn er samt annarra, þeirra sem hafa ávallt stutt okkur, sem hafa hjálpað okkur, hvatt okkur, hughreyst okkur og gert okkur að betri mönnum. Takk mamma. Takk Ísland,“ segir Kristófer Acox fyrir hönd landsliðsins.
Kristófer er alinn upp af einstæðri móður, Ednu Maríu Jacobsen og móður hennar, Magnhild, sem er fallin frá og kynntist hann föður sínum fyrst, þegar hann var 14 ára.

Alinn upp af mömmu og ömmu Kristófer er alinn upp af einstæðri móður, Ednu Maríu Jacobsen og móður hennar, Magnhild.

„Ég bara grenjaði í gær þegar ég sá þetta, maður verður svo ótrúlega stolt, auðmjúk og glöð,“ segir Edna María Jacobsen, móðir Kristófers og ein þeirra mæðra sem leika í auglýsingunni.

„Hugurinn fór á flug til baka yfir öll árin sem ég var ein af mömmunum sem mætti á alla leiki, sem smurði nesti, stóð í fjáröflunum og svo framvegis.

„Ég er fyrst og fremst stoltust af honum Kristófer, af því að hann hefur yfirstigið ýmsa erfiðleika og er núna kominn alla leið. Og stolt af liðinu, strákunum okkar.“

Mömmurnar á bekknum Nokkrar mæður landsliðsmannanna á bekknum, þar sem þær hafa oft setið, ásamt öðrum ættingjum og vinum, og hvatt og stutt sína stráka,

Evrópumótið fer fram 31. ágúst – 17. september og Ísland er í riðli með Finn­um, Frökk­um, Grikkj­um, Pól­verj­um og Slóven­um. Íslenska liðið skipa:

Mart­in Her­manns­son – Chalon-Reims – 51 lands­leik­ur
Ægir Þór Stein­ars­son – Tau Ca­stello – 48 lands­leik­ir
Kristó­fer Acox – KR – 25 lands­leik­ir
Hlyn­ur Bær­ings­son – Stjarn­an – 111 lands­leik­ir
Jón Arn­ór Stef­áns­son – KR – 91 lands­leik­ur
Elv­ar Már Friðriks­son – Barry há­skól­inn í BNA – 27 lands­leik­ir
Hörður Axel Vil­hjálms­son – Ast­ana – 65 lands­leik­ir
Logi Gunn­ars­son – Njarðvík – 138 lands­leik­ir
Pavel Ermol­in­skij – KR – 62 lands­leik­ir
Hauk­ur Helgi Páls­son – Cholet – 56 lands­leik­ir
Tryggvi Snær Hlina­son – Valencia – 19 lands­leik­ir
Brynj­ar Þór Björns­son – KR – 62 lands­leik­ir

Þrjú myllumerki verða notuð í keppninni og er rétt að vera með þau á hreinu áður en mótið hefst:
EuroBasket2017, er notað fyrir mótið í heild,
korfubolti, er notað af íslenskum áhorfendum og hefur verið gert í áraraðir
IceEm17, er notað af stuðningsmönnum íslenska liðsins og því sem þeir vilja deila