Afmælis- og styrktargolfmót Soroptimistasystra á Nesinu
40 ára afmælis- og styrktargolfmót Soroptimistasystra á Seltjarnarnesi fór fram fyrir stuttu á Nesvellinum hjá Nesklúbbnum á Seltjarnarnesi. Yfir 80 konur skemmtu sér á golfvellinum og var leikgleðin í fyrirrúmi, en þetta var sjötta styrktargolfmótið sem þær halda.
„Golfmótið er ein aðalfjáröflunarleið Soroptimistasystra ásamt happdrætti á skemmtikvöldi í nóvember með þeim vinningum sem ekki ganga út í golfmótinu en Soroptimistasystur hafa notið góðvildar fjölmargra fyrirtækja sem styrkja klúbbinn í góðgerðastarfinu,“ segir Sjöfn Þórðardóttir, formaður Soroptimistaklúbbsins, sem einnig var mótsstjóri golfmótins.
Mótið fór fram í sól og blíðu þar sem konur spiluðu golf með bros á vör. Mótið var fullbókað og vel það þar sem bæta þurfti við hollum til að koma öllum að enda ávallt biðlisti eftir að komast að.
Hefð er fyrir því að bjóða keppendum upp á hressingu þar sem 5. og 9. teigur á nesinu mætast í gómsætt heimabakað góðgæti, drykki og skálað er í freyðivíni sem ávallt vekur jafn mikla lukku.
„Allar konur ljúka leik á sama tíma svo það myndast góð og skemmtileg stemning að móti loknu þegar allar koma inn eftir spilið, hressar og glaðar eftir skemmtilega útiveru,“ segir Sjöfn. Boðið var upp á Prosecco í fordrykk í boði Vífilfells við golfskálann. Að því loknu var haldið inn í skálann, þar sem kvöldverður var snæddur meðan á verðlaunaafhendingu stóð.
„Hingað til hefur engin kona farið heim án verðlauna á mótinu sem skemmir ekki stemninguna, en dregið var úr öllum skorkortum þátttakenda að verðlaunaafhendingu lokinni. Einnig voru dregin úr skorkortum sérstök afmælisverðlaun sem voru meðal annars Útsýnisflug með Norðurflugi,“ segir Sjöfn.
Soroptimistar eru alþjóðleg hjálpar- og friðarsamtök kvenna. Soroptimistaklúbbur Seltjarnarness var stofnaður 24. september árið 1977 og á því 40 ára afmæli í ár. Hann hefur rétt margvíslegum málefnum hjálparhönd með styrkveitingum. Allur ágóði 40 ára afmælis golfmótsins rennur til styrktar verkefni í heimabyggð í samstarfi við Miðstöð foreldra og barna og Heilsugæslustöð Seltjarnarness, sem færa verðandi foreldrum bókina „1000 fyrstu dagarnir – barn verður til“ sem er ætlað að aðstoða foreldra fyrstu árin í lífi barnsins.
Golfkonur skemmtu sér vel á mótinu.
Punktakeppni án forgjafar:
Punktakeppni með forgjöf:6. sæti Hlín Helga Pálsdóttir5. sæti Fríða B. Andersen4. sæti Kristjana Ólafsdóttir3. sæti Jónína Ragnheiður Ketilsdóttir2. sæti Aðalheiður Anna Guðmundsdóttir1. sæti Sigríður Sigtryggsdóttir
Næstar holu:2. braut Laufey Oddsdóttir5. braut Elínborg Sigurðardóttir8. braut Dóra Ingólfsdóttir
Lengsta upphafshögg: Hulda S. Sigtryggsdóttir