Afmælishátíð Reykjavíkurborgar, Menningarnótt, var haldin í tuttugasta og annað skipti þann 19. ágúst. Fjöldi fólks lagði leið sína í miðbæinn, enda bauð veðrið upp á einn dagskrárlið: gott veður, meðan gestir nutu fjölda menningarviðburða af ýmsum toga um alla miðborgina.
Yfirskrift hátíðarinnar er „Gakktu í bæinn!“ sem vísar til þeirrar gömlu og góðu hefðar að bjóða fólk velkomið og gera vel við gesti.
Sumarið er að lokum komið og haustið bankar upp á og Menningarnótt er byrjun menningarárs borgarinnar þegar haust- og vetrardagskrá hefst hjá leikhúsum, söfnum og öðrum menningarstofnunum. Menningarnótt hvetur gesti til menningarþátttöku og að njóta þverskurðar af menningar- og listflóru borgarinnar.
Pulsaðu þig upp Þröstur Leó Guðjónsson stóð vaktina og pulsaði vegfarendur upp við Hlemmur Square.
Ótal andlit Iðunnar Fyrir ofan Brauð og Co á Frakkastíg í einstöku, flottu og hráu sýningarrými buðu Harpa Rún Ólafsdóttir, á mynd ásamt Iðu dóttur sinni, og María Kjartans upp á ævintýralega myndlistasýningu, þar sem verkin eru blanda af ljósmynd og teikningu. María myndar magnþrungið samspil náttúru, manna og dýra og Harpa myndgerir náttúruna og skapar með teikningunni heim þar sem áhorfandanum er boðið upp á að skyggnast í hulduheima náttúrunnar.
Að bakarabaki Þegar gengið er inn og út af sýningarrýminu má skyggnast inn bakdyramegin á Brauð og co.
Bakað af lyst Það var fullt út úr dyrum á Brauð og Co og meðan beðið er í röðinni má kíkja á bakarana að störfum.
Vel sótt útikarókí Margrét Erla Maack og Ragnheiður Maísól Sturludóttir skipa tvíeykið Hits&Tits (eða Fútt og túttur í þýðingu Guðna Kolbeinssonar). Þeim er margt til lista lagt og eru meðal annars kabarettdrottningar, plötusnúðar og uppistandarar og buðu þær upp á gríðarlega vel sótt útikarókí við útitaflið á Lækjargötu. Þessi ungi maður tók lag Lady Gaga, Bad Romance, við mikinn fögnuð áheyrenda.
Fýkur yfir hæðir Hin fjölhæfa Brynhildur Björnsdóttir réðst ekki á garðinn þar sem hann er lægstur og rúllaði upp lagi Kate Bush, Wuthering Heights.
Raggi rokkar Hin einstaki Ragnar Bjarnason skemmti í Græna herberginu í Lækjargötu og Pálmi Sigurhjartarson lék undir.
Frábær í Græna Friðrik Dór steig á svið í Græna herberginu.
Hitti goðið Valdimar Víðisson, skólastjóri Öldutúnsskóla í Hafnarfirði, hefur frá því hann var 10 ára gamall verið aðdáandi Ragga Bjarna. Það fór því vel á með þeim félögum.
Trúbador við Laugaveg Músík einkenndi miðborgina og þessi söngkona söng við Laugaveginn.
Músíkblanda af bestu gerð Þórður Högnason á bassa, Pálmi Sigurhjartarson á hljómborð, Björgvin Ploder á trommur og söngkonan Dagný Halla Björnsdóttir buðu upp á músíkblöndu af bestu gerð á Petersen svítu Gamla bíós.
Alþýðlegir og góðir Andri Freyr, Siggi og Siddi skipa tríóið Alþýðulagabandið, sem spilaði fyrir gesti Egilsgötu, en þar voru þeir í húsagarði og tóku ábreiður af mörgum fallegustu lögum okkar, eftir höfunda eins og Magnús Eiríksson, Kristján Kristjánsson, Megas og Gunnar Þórðarson.
Ljótar gjafir í 21 ár Systurnar Íris og Þóra Emilsdætur og eiginmenn þeirra, Sigurður og Helgi, hafa hrekkt hvert annað í 21 ár með því að gefa forljóta minjagripi sem þau hafa fundið á ferðalögum sínum um heiminn. Þau héldu sýningu á gjöfunum á Menningarnótt.
Listamaður að verki Í Gallerí Fold voru tvær listakonur að störfum og ræddu við gesti um listina. Hér má sjá Soffíu Sæmundsdóttur sýna handverk sitt.
List verður til Nýjasta listaverk Aðalbjargar Þórðardóttur, Öbbu, lifnar við á striganum á Menningarnótt.
Troðinn Hlemmur – Mathöll Það var gjörsamlega fullt út úr dyrum í Hlemmur – Mathöll og varla pláss til að mynda. Hér bíða gestir spenntir eftir að prófa ísinn hjá Ísleifi heppna.
Spessi skipuleggur Sigurþór Hallbjörnsson, eða Spessi ljósmyndari eins og hann er best þekktur, sá um að bifhjólin kæmust sem best fyrir í miðborginni.
Reykjavík Custom Bike Show Sjötta árið í röð var sýningin Reykjavík Custom Bike Show haldin og var hún í fjórða sinn í Naustunum, þar sem allir helstu rokkstaðir bæjarins eru. Tilgangurinn er að halda veislu, hlusta á rokk og ról og í leiðinni sýna afrakstur þess sem menn hafa dundað sér við í skúrunum um veturinn.
Herra heppinn Björn Brynjar Steinarsson járnsmiður er Lucky Strike-maðurinn og vekur athygli á hjólinu.
Frúin hlær á línuskautum „Frúin hlær í betri bíl“ voru einkunnarorð Bílasölu Guðfinns, en hann Guðfinnur Stefán Halldórsson mætti að þessu sinni á línuskautum við Hörpu. Þar sýndu meðlimir Krúserklúbbsins glæsibifreiðar sínar.
Cadillac-flúr Aðalsteinn Ásgeirsson, eða Steini í Svissinum eins og hann er jafnan kallaður, lætur sér ekki nægja að keyra Cadillac, hann er líka með Cadillac-merki flúrað á sig.
Blús við Hörpu Nokkrir blússpilarar úr hinum ýmsu sveitum, með Gunnar Örn Sigurðsson gítarsmið fremstan í flokki, léku fyrir framan Hörpu.
Gísli Rúnar glaðvær Leikarinn Gísli Rúnar Jónsson var hress og kátur við Hörpu.
Glæsilegar mæðgur Mæðgurnar Eva Dögg Sigurgeirsdóttir og Edda Björgvinsdóttir eru meðal skemmtilegustu og glæsilegustu mæðgna landsins.
