Góðgerðasamtökin B.A.C.A., Bikers Against Child Abuse eða Samtök bifhjólafólks gegn barnaofbeldi, héldu nýlega sína fyrstu fjölskylduhátíð. Hátíðin var vel sótt, en félagið hefur það markmið að vernda börn gegn ofbeldi í hvaða mynd sem það birtist.

Grill og fjör Það var vel mætt á fyrstu fjölskylduhátíð B.A.C.A. Boðið var upp á grill, bæklingum dreift og söfnunarbaukur var á staðnum. Brugðið var á leik með ratleik, krikket og minigolfi.

„Fjölskylduhátíðin okkar er ein af skylduuppákomum samtakanna,“ segir Arnbjörn, eða Addi eins og hann er alltaf kallaður, forseti samtakanna. „Við erum einnig með jólahóf og 100 mílna ferð eða reið, sem við höfum haldið tvisvar og var gríðarleg fjölgun í henni á milli ára. Mætingin á fjölskylduhátíðina fór einnig fram úr okkar björtustu vonum og eigum við von á að enn fleiri mæti á næsta ári.“ Allir eru velkomnir á fjölskylduhátíðina, bifhjólafólk sem aðrir.

Varaforseti Bangsi er varaforseti B.A.C.A.

Allar uppákomurnar eru haldnar á sama tíma á Íslandi og í öðrum löndum þar sem samtökin starfa, en B.A.C.A., sem stofnuð voru hér á landi 26. september 2016, eru hluti af alþjóðasamtökum.

„B.A.C.A. starfa í öllum fylkjum Bandaríkjanna, Ástralíu, Kanada, í 14 löndum í Evrópu og Ísland er fyrsta Norðurlandaþjóðin,“ segir Addi. „Bæði Svíþjóð og Danmörk eru á leiðinni inn í samtökin. Og það er gífurleg vakning og áhugi á samtökunum í Evrópu.“

Hjólin prófuð Allir sem vildu fengu að prófa að setjast á mótorhjólin.

20 ára gömul samtök

B.A.C.A. voru stofnuð árið 1996 í Bandaríkjunum af John Paul Lilly, sem var barnasálfræðingur og vann mikið með börnum sem orðið höfðu fyrir ofbeldi. Hjálparvana horfði hann á börn fara frá honum og aftur í sömu aðstæður og ofbeldi. Lilly, sem var sjálfur bifhjólamaður, ákvað að prófa að bjóða átta ára gömlum dreng, sem var í meðferð hjá honum, með í hjólatúr. Hann sá þvílíka breytingu á drengnum eftir þann eina túr og enn meiri breytingu eftir því sem ferðunum fjölgaði. Hugmyndin að B.A.C.A. var fædd.

Grillað í Guðmundarlundi Öllum var boðið upp á veitingar, grillaðar pylsur og drykki.

„Við erum góðgerðasamtök og við leggjum mikla áherslu á að þeir sem starfa með okkur geri sér grein fyrir ábyrgðinni og tímanum, sem ætlast er til af þeim,“ segir Addi. „Það er 80 prósent þátttökuskylda í öllum okkar uppákomum.“

Langur og góður undirbúningur var að stofnun samtakanna hér á landi, sem og annars staðar, en stjórn samtakanna sat fjölda námskeiða áður en leyfi fékkst fyrir stofnun B.A.C.A. hér á Íslandi.

Merki félagsins B.A.C.A., Bikers Against Child Abuse, sem útleggst á íslensku sem Bifhjólamenn gegn barnaofbeldi.

Ofbeldi gagnvart börnum er ekki liðið

„Við líðum ekki ofbeldi í neinni mynd,“ segir Addi. „Áður en börn njóta verndar BACA eru þau hrædd og öryggislaus. En með aðkomu BACA og viðveru finna þau aftur öryggið og hræðslan hverfur.“

Þegar B.A.C.A. fá ábendingu um barn sem býr við ótta eða ofbeldi þá fer B.A.C.A.-hópurinn til barnsins, það kynnist hópnum, það er talað við barnið og útskýrt að ef það vilji, fái það inngöngu í samtökin. Barnið fær að velja sér vesti, bakmerki og vegnafn („roadname“). Við látum barnið vita að við séum til staðar fyrir það hvenær sem er sólarhringsins. Barnið velur sér sjálft tvo tengiliði og getur hringt hvenær sem er í viðkomandi. Ef barnið hringir þá er tengiliðurinn kominn til hans innan nokkurra mínútna,“ segir Addi, sem gerir gott betur en að hjóla til verndar börnum, því á morgun, laugardaginn 19. ágúst, ætlar hann að hlaupa þrjá kílómetra í leðurgallanum í maraþoninu.

Facebooksíða

Forsetinn aðstoðar Addi forseti mættur til að aðstoða við límmiðatattúin.