Gung Ho-hlaupið var haldið á Íslandi í fyrsta sinn laugardaginn 12. ágúst síðastliðinn og seldist upp í hlaupið, sem fór fram í Laugardalnum í brakandi blíðu. Gung Ho er ekkert venjulegt hlaup, heldur risavaxin og skemmtileg hlaupaþrautabraut fyrir alla, stóra sem smáa.
„Við erum í skýjunum hvernig til tókst, það fóru allir brosandi heim, þá erum við glöð sem stöndum að þessu,“ segir Davíð Lúther Sigurðarson hjá BASIC sem sér um Gung Ho, en fyrirtækið hefur einnig staðið að The Color Run-litahlaupinu, síðustu þrjú ár.
Skilgreining á orðatiltækinu Gung Ho er þríþætt.Upphaflega kemur hugtakið til hins vestræna heims frá Kína þar sem Gung Ho stendur fyrir samvinnu.Gung Ho er notað yfir aðila sem eru einbeittir og ætla að fara „alla leið“ í því sem þeir eru að gera.Gung Ho er heitið á heræfingum þar sem þátttakendur klifra yfir timburveggi, skríða undir kaðla og hlaupa í gegnum dekkjaþrautir svo eitthvað sé nefnt.
Gung Ho hlaupabrautin er engin smásmíði, hún er er fimm kílómetra löng og samanstendur af tíu risavöxnum uppblásnum hindrunum. Það var því ljóst að finna þurfti góðan og stóran stað til að halda viðburðinn og var honum fundinn staður í Laugardalnum.
„Við þurftum að komast í bæði mikið rafmagn og mikið pláss. Við þurfum gríðarlega stórt svæði, og sem dæmi þá er ein brautin 370 fermetrar, þetta voru því þúsundir fermetra sem okkur vantaði.“
Vegna vinsælda The Color Run ákváðu Davíð Lúther og félagar hans að skoða fleiri hlaup og fundu Gung Ho í Bretlandi. „Það var prufukeyrt þar með nokkrum Íslendingum og niðurstaðan varð sú að þetta væri stórkostleg skemmtun og óhefðbundin, þannig að við létum slag standa, sóttum um réttindin meðan við vorum enn úti og fengum réttinn til að halda hlaupið á Íslandi og í Skandinavíu,“ segir Davíð Lúther.
Niðurstaðan varð sú sama hér heima, uppselt var í hlaupið og skemmtu allir sér konunglega, ungir sem aldnir, fjölskyldur sem einstaklingar og mun Gung Ho snúa aftur næsta sumar.