Vissi alltaf að hún væri ennþá á meðal þeirra bestu – Stefnir næst á gullið – Myndi aldrei taka inn lyf
Annie Mist Þórisdóttir endaði í þriðja sæti á Heimsleikunum í crossfit sem fram fóru í byrjun mánaðarins. Þetta er í níunda skiptið sem Annie tekur þátt í leikunum og í fimmta skiptið sem hún endar á verðlaunapalli. Í einlægu viðtali ræðir Annie um íþróttina sem hún elskar, hvernig hún slökkti á efasemdaröddunum sem töldu hana búna, meiðslin og sálarlífið, umræðuna um steranotkun sem hún segir bæði sorglega og leiðinlega og ástina sem hún fann í crossfit.
Hér að neðan birtist brot úr viðtalinu en þar ræðir hún meðal annars um þá löngun sína að eignast barn. Það muni þó ekki gerast strax en kærasti Annie er Daninn Frederik Ægidus.
Átökin sem fylgja því að vera á meðal þeirra bestu í jafn harðri keppni gerir að verkum að það verður ekki sjálfgefið að snúa til baka eftir barnsburð þótt vissulega séu þess dæmi. Aðspurð segir Annie að barneignir þeirra Frederiks verði að bíða betri tíma.
„Það mun gerast, en ekki strax. Það er allavega ekki planið að það gerist á næstunni,“ segir hún en segist ekki líta á það sem fórn. „Ég veit að við munum eignast börn í framtíðinni þannig að ég lít ekki á það sem fórn. Það mun gerast en ekki strax,“ segir Annie sem verður 28 ára í september.