Stefanía Tara Þrastardóttir ber höfuð og herðar yfir allar aðrar stúlkur í vefkosningu Ungfrú Ísland sem fer fram á Facebook. Sú sem fær flest læk þar mun verða krýnd „Miss Peoples Choice Iceland 2017“ eða einfaldlega vinsælasta stúlkan. Hún er nú þegar komin með tæplega tvö þúsund læk, sem er helmingi meira en sú sem kemur næst á eftir henni.

Í viðtali við Bleikt á dögunum sagði Stefanía eftirminnilega að móðir hennar kallað sig „Litlu bollu beikon“. „Ég skráði mig algjörlega í einhverju sjálfstraustarkasti og hugsaði svo ekkert um það meira. Ég trúi þessu ekki enn þá. Litla Bolla Beikon, eins og mamma kallar mig, að fara í Ungfrú Ísland?,“ sagði Stefanía í samtali við Bleikt.

Hún hefur starfað með börnum síðasta eitt og hálft ár en hún segir að draumurinn sinn sé að stofna eigin fyrirtæki. Stefanía er 22 ára og er frá Akureyri. „Þegar það opnaði fyrir umsóknir aftur í ár fékk ég tölvupóst um það og ákvað að senda inn aftur. Ég hugsaði bara: af hverju ekki? Mér líður rosalega vel með það. Svona ferli kennir manni margt og meðal annars að elska sjálfan sig enn meira og kunna að meta nákvæmlega hvernig maður er,“ sagði Stefanía í viðtali við Bleikt.

Hér fyrir neðan má taka þátt í vefkosningunni: