Marlín Birna stofnaði Óðinsgötu-hóp á Facebook
Flest eigum við hlýjar og góðar minningar um bernskustöðvarnar, heimilið sem við ólumst upp á, leikvöllinn sem við lékum okkur á, vinina og leikfélagana í æsku og eftir því sem við verðum eldri verður skemmtilegra að rifja þessar minningar upp með myndum og sögum, bæði okkar eigin og annarra sem urðu á vegi okkar.
„Mig langaði að stofna hóp á Facebook fyrir þau okkar sem ólumst upp á Óðinsgötu, og nágranna okkar,“ segir Marlín Birna, stofnandi hópsins sem innan við viku síðar telur 115 meðlimi.
Marlín Birna, sem fædd er árið 1971 og hefur verið búsett í London í nokkur ár, ólst upp hjá ömmu sinni og afa að Óðinsgötu 30a. Margir meðlima hópsins (greinarhöfundur þar á meðal) sem léku við Marlín Birnu, sem börn, muna vel eftir ömmu hennar og afa, sem bæði eru fallin frá. Þau voru eðalfólk heim að sækja og börn alltaf velkomin á þeirra heimili.
„Hópurinn er ætlaður íbúum, fyrrverandi íbúum og hollvinum Óðinsgötu,“ segir Marlín Birna og hvetur þá sem lýsingin á við til að sækja um inngöngu í hópinn sem heitir einfaldlega Óðinsgata og deila skemmtilegum myndum og sögum.
Margir hafa þegar tekið fram gömul myndaalbúm og deilt myndum frá sinni barnæsku í hópnum og er gaman að rifja upp kunnugleg andlit, þekkta karaktera úr hverfinu, fyrirtæki og verslanir sem horfin eru á braut og fleira. Frá Óðinsgötu var líka stutt í leiksvæði á Skólavörðuholtinu og í Hljómskálagarðinum svo dæmi séu tekin.