Gunnar Hrafn Jónsson, þingmaður Pírata, birtir á FB-síðu sinni nokkuð skondna ljósmynd af hinum heimsfræga kvikmyndaleikstjóra, Quentin Tarantino, og við hlið hans mynd af Jóni Vali Jenssyni, þekktum guðfræðingi, bloggara og baráttumanni fyrir kristilegum og þjóðlegum gildum. Með myndunum skrifar Gunnar Hrafn:

„Tarantino er búinn að fara í major plastík aðgerðir til að geta leikið hlutverk lífs síns í mynd sem hann skrifar og leikstýrir sjálfur: „Jon Valur: A Story“

Jón Valur kann ekki að meta myndbirtinguna og spaugið og bregst reiður við. Hann skrifar ummæli undir færslunni:

„Hvað telur þessi þingmaður sig vera? Mér var sagt frá þessu og að þetta hefði verið skrifað hér í háði. „Ekkert fyndið við þetta hjá honum,“ var athugasemd þess, sem lét mig vita. En hvaða borgara landins ætlar Gunnar Hrafn Jónsson að taka næst fyrir með líkum hætti? Og er þetta partur af viðleitni hans til að ná til kjósenda sinna, meðan Alþingi er í sumarfríi – að níða saklausa og birta líka fleira niðrandi um þá í stað þess að kasta út slíkum innleggjum? Og er þetta kannski til marks um örvæntingu Pírata í fylgishruni þeirra – verða persónuárásir svar þessa gagnslausa flokks til að vekja á sér athygli?“

Gunnar Hrafn biður Jón Val um að róa sig, segir að hér sé ekkert níð á ferð heldur sé það öfundsvert að líkjast einum mesta listamanni samtímans í útliti:

„Rólegur, þetta er besti leikstjóri allra tíma og í miklu uppáhaldi hjá mér. Næst líki ég þér kannski við Orson Welles eða Nelson Mandela, tveir kappar sem ég elska líka en vill svo illa til að þeir líkjast þér ekki í útliti kæri vin

„Jón Valur, þú ert sláandi líkur einhverjum mesta listamanni samtímans, margir virðast sammála, og ég vildi eiginlega óska að ég væri í sömu sporum. Nákvæmlega ekkert níð hér á ferð þó að ég vildi óska að JVJ gerði fleiri kvikmyndir “🙂