Eistnaflug haldið á Neskaupstað í þrettánda sinn
Aðra helgina í júlí ár hvert tvöfaldast íbúafjöldi Neskaupstaðar þegar tónlistarhátíðin Eistnaflug er haldin þar. Eistnaflug hefur verið haldin árlega síðan sumarið 2005 og flykkjast aðdáendur rokk-, metal- og indítónlistar austur til að njóta góðrar tónlistar í ægifögru umhverfi Neskaupstaðar.
Fjöldi íslenskra og erlendra hljómsveita hefur stigið á svið á Eistnaflugi og má þar nefna DIMMU, Sólstafi, Skálmöld, The Dillinger Escape Plan, Bloodbath og Voices. Allar spiluðu þær á Eistnaflugi í ár, auk fjölda annarra hljómsveita.
Það er Herra Eistnaflug sjálfur, Stefán Magnússon, sem hefur veg og vanda af Eistnaflugi ásamt aðstoðarfólki sínu. Árið 2005 var hann í pönkhljómsveitinni Dys og langaði að reyna að fá fjárstyrk til að halda rokkhátíð. Það gekk eftir og um 20–30 manns mættu, þar af margir nemenda Stefáns, sem var íþróttakennari á staðnum. Nafngiftin varð til af einskærum húmor og sama á við um nafn hlutafélagins á bak við hátíðina, Millifótakonfekt ehf.
Hátíðin hefur síðan stækkað verulega að umfangi síðan og í ár var boðið upp á um 50 hljómsveitir, þar af 11 erlendar. Eistnaflug er orðin að fjögurra daga tónlistarveislu, þar sem metal-, harðkjarna-, pönk-, rokk- og indíhljómsveitir deila sviðinu saman. Nýjar hljómsveitir mæta árlega og því er alltaf eitthvað nýtt í boði á hverju ári.
Eitthvað sem gestir hafa ekki upplifað áður á Eistnaflugi, en aðeins tvær reglur gilda á hátíðinni: Að skemmta sér konunglega og að vera ekki fáviti!
Hjalti Árnason, lögfræðingur Byggðastofnunar, sem er mikill tónlistar- og tónleikaáhugamaður, mætti á Eistnaflug í ár í fimmta sinn. Myndavélin fylgdi með og gaf Hjalti Birtu góðfúslegt leyfi til að birta myndir sem hann tók á tónlistarhátíðinni. Fleiri myndir má sjá á ljósmyndasíðu Hjalta, www.flickr.com/hjaltiarna.
Eistnaflug verður haldið að ári, þann 11.–14. júlí og geta áhugasamir því byrjað að telja niður, en þangað til eru 11 mánuðir og 27 dagar.