Fjallar um stöðu íslenskrar tungu
„Nú er sjálf okkar, innsti kjarninn, rót menningar okkar að veði. Við verðum að snúa vörn í sókn,“ segir tónlistarmaðurinn Bubbi Morthens í kraftmiklum pistli um stöðu íslenskrar tungu.
Pistillinn, sem ber yfirskriftina Setjum hjartað í málið, birtist í Fréttablaðinu í dag. Þar lýsir Bubbi áhyggjum sínum af íslenskri tungu sem hann segir að eigi undir högg að sækja.
„Tölvur, snjallsímar, bíó og sjónvarp með enskuna að vopni brjóta niður varnir íslenskunnar án erfiðleika. Æ fleira ungt fólk í tónlistarheiminum kýs að syngja á ensku en sem betur fer kjósa margir enn þá að syngja og rappa á íslensku,“ segir Bubbi sem rifjar upp að yngsta dóttir hans, sem er 5 ára, hafi hrópað upp yfir sig:
„Oh my goodness“ öðru hvoru þar til hann sagði henni að hrópa í staðinn: „Guð minn góður“. Bubbi segir að þetta hafi virkað og þegar henni sé mikið niðri fyrir noti hún íslenskuna frekar en enskuna.
Bubbi bendir á að heimurinn sé ekki lengur svo stór og í raun ekki stærri en síminn í lófanum á okkur.
„Hvernig væri að hin ofsaríku útgerðarfyrirtæki, sem hafa mokað milljörðum upp úr hafinu árum saman, settu ásamt íslenskum stjórnvöldum peninga í það verkefni að bjarga íslenskunni?“
„Þar eru stjórntækin enskumælandi, leikirnir, textinn, allt er á ensku. Meðan íslenskan er að berjast fyrir lífi sínu í brimboðum enskunnar hafa menn slökkt á vitanum. Það sést ekki til lands. Æ fleiri fyrirtæki í græðgisbríma kasta íslenskunni. Í veitingahúsabransanum er það að verða þannig að þjónar tala ekki íslensku, matseðlar eru á ensku, staðirnir bera ensk nöfn. Í fjármálageiranum fara fyrirlestrar fram á ensku. Það nýjasta nýja er að Flugfélagi Íslands varð brátt í brók og skírði kúkinn Air Iceland Connect. Virðingin fyrir sögunni, arfleifðinni, tungumálinu var ekki meiri hjá þessu gamalgróna fyrirtæki.“
Bubbi metur það þannig að mikilvægara sé að setja peninga í að íslenska tölvur en að grafa göng. „Hvernig væri að hin ofsaríku útgerðarfyrirtæki, sem hafa mokað milljörðum upp úr hafinu árum saman, settu ásamt íslenskum stjórnvöldum peninga í það verkefni að bjarga íslenskunni?“
Bubbi endar pistilinn á því að segja að við þurfum á íslenskunni að halda og íslenskan þurfi á okkur að halda. „Þú berð ábyrgð. Við berum ábyrgð á að tungumálið okkar lifi. Setjum hjartað í málið.“
