Karen Lovely heimsfræg blússöngkona heilluð af Íslandi
Fimmta plata blússöngkonunnar Karen Lovely, Fish Outta Water, situr nú í þrettánda sæti á blúsplötulista Billboard, þrátt fyrir að vera enn ekki komin út, en forpantanir á plötunni koma henni inn á listann. Plötuumslagið og lögin á plötunni eru undir áhrifum frá Íslandi, enda hefur Lovely heimsótt landið oftar en einu sinni og er heilluð af landi og þjóð.
„Já, nýja platan mín er undir miklum áhrifum frá Íslandi og þeim tíma sem ég varði þar,“ segir Karen. „Myndir á plötuumslaginu eru myndir sem ég tók á Íslandi og lagið „Under the Midnight Sun“ er skrifað um Íslandsdvölina. Ég kom þrisvar til Íslands í fyrra og vinirnir sem ég eignaðist í þeim ferðum breyttu lífi mínu. Ég var svo lánsöm að koma fram á Blúshátíð í Reykjavík og það einstök upplifun.“
Karen hóf söngferilinn árið 2007, þá komin vel á fimmtugsaldur. Hún hefur verið tilnefnd til verðlauna fyrir söng sinn og lagasmíðar, síðast í fyrra þegar hún var tilnefnd sem besti samtímakvenblúsarinn á Blues Music Awards.
Í fyrra, þegar hún var gestur á Blúshátíð í Reykjavík, söng hún meðal annars afmælissönginn fyrir tónlistarmanninn Kristján Kristjánsson, KK, sem átti sextugsafmæli þá. Einnig söng hún fyrir Robert Barber, þáverandi sendiherra Bandaríkjanna, sem gaf henni sendiherranælu sína sem þakklætisvott fyrir frábæra frammistöðu á sviðinu.
„Í maí í fyrra kom ég svo aftur og söng fyrir þá sem höfðu komið að og unnið við blúshátíðina og tónlistarmennirnir sem spiluðu með mér á hátíðinni voru svo frábærir, að ég bauð þeim að koma með mér og gítarleikara mínum á stóra hátíð sem var í Póllandi í júlí,“ segir Karen heilluð af landi og þjóð og bætir við að sex vinir hennar búsettir í Bandaríkjunum hafi bókað ferðir til Íslands eftir að hafa séð myndir frá Íslandsferðum hennar.
