Inga Auðbjörg Straumland náði þeim áfanga á dögunum að stýra hundruðustu athöfn sinni á vegum Siðmenntar frá því að hún varð athafnastjóri þar haustið 2013. Mjög hefur aukist að fólk leiti til Siðmenntar og fái athafnastjóra félagsins til að stýra athöfnum af ýmsu tagi, svo sem giftingum og nafngiftum. Þannig létu ríflega 170 pör pússa sig saman hjá félaginu í fyrra, og talsverður hluti þeirra útlendingar.
Þegar blaðamaður heyrði í Ingu var hún einmitt að koma frá því að gifta erlent par í Fjaðrárgljúfri. „Siðmennt var nýlega búið að fá leyfi til að standa fyrir hjónavígslum árið 2013. Það var sendur póstur á póstlista félagsins og óskað eftir fólki til að verða athafnastjórar, sérstaklega konum. Ég hugsaði: Þetta er eitthvað sem ég get gert, talað fyrir framan fólk og haldið upp á ástina. Ég sló þess vegna til, fór á námskeið og er núna einn virkasti athafnastjóri Siðmenntar.“
Þeir sem kjósa að nýta sér þjónustu Siðmenntar geta ýmist beðið um ákveðna athafnastjóra eða óskað eftir þjónustu óháð því hver veitir hana. Inga segir að flestar athafnir sem hún kemur að komi í gegnum ferðaþjónustufyrirtækið Pink Iceland, sem sérhæfir sig í ferðaþjónustu við hinsegin fólk en er einnig eitt stærsta brúðkaupsskipulagsfyrirtæki landsins, fyrir bæði hinsegin pör og gagnkynhneigð.
Inga hefur fyrst og fremst gefið fólk saman en einnig hefur hún gefið börnum nöfn og leitt eina fermingarathöfn. Hún hefur enn ekki fylgt fólki til grafar.
„Mín sérstaða sem athafnastjóra er að vera fyndin og skemmtileg og það eru kannski ekki alveg sterkustu hæfileikarnir við þær aðstæður. Það er samt þannig að það eru fjölskyldur þar sem ég hef gefið saman fólk og nefnt börn og ég mun að sjálfsögðu sjá um útfarir í slíkum tilvikum, ef til kemur.“