„Gríðarlega mikilvægt fyrir íslenska tungu að fá þátt eins og þennan á íslensku“
Í vikunni fór í loftið nýr og vandaður íslenskur afþreyingarþáttur sem fjallar um allt það helsta sem er að gerast í heimi tölvuleikja, hugbúnaðar og kvikmynda hverju sinni. Þátturinn sem heitir Boxið er á YouTube en í hverjum þætti verða fjórir til fimm efnisþættir teknir til umfjöllunar. Stjórnendur Boxins eru þeir Ragnar Steinn Clausen og Daníel Már Bonilla sem eru miklir áhugamenn um tölvuleiki og tækninýjungar.
Í fyrsta þættinum, sem má sjá hér að neðan, er fjallað um tölvuleikina Farpoint, Destiny II og Playstation Aim controller. Þá er fjallað um nýju Nintendo leikjatölvuna sem kom út í vor.
„Það vantaði þátt á íslensku þar sem fjallað er um allt það sem er að gerast í þessum í geira. Við ætlum að sýna klippur og fara dýpra í hlutina heldur en hefur verið gert áður hérlendis. Það sem skiptir okkur mestu máli er að fólk geti horft á þátt á íslensku. Fjölmargir fylgjast með sambærilegum þáttum a ensku en okkur þykir gríðarlega mikilvægt að íslensk ungmenni og annað áhugafólk um tölvur og tölvuleiki geti nálgast efni og fræðslu um þessi mál á íslensku,“ segir Ragnar Steinn.
Samhliða Boxinu ætla þeir félagar svo að bæta við öðrum þætti sem ber heitið „Spilum saman.“ Þar munu þeir taka fyrir ýmsa leiki en fyrirmynd þáttarins byggir á fyrirkomulaginu Let‘s Play.
Í þættinum munu þeir Ragnar og Daníel spila einn tölvuleik, spjalla saman og sýna úr leiknum í um það bil korter. Fyrsti þátturinn af „Spilum saman,“ fer í loftið á You Tube næstkomandi laugardag.
Hér að neðan má sjá fyrsta þáttinn af Boxinu.
[youtube https://www.youtube.com/watch?v=6a574rxiySc&w=560&h=315]