Katrína Mogensen söngkona Mammút var í löngu og ítarlegu viðtali við Morgunblaðið þar sem meðal annars var rætt um að kynjahlutföll og jafnrétti hefðu aukist í tónlist eftir því að hljómsveitin kom fram á sjónarsviðið. Þá var einnig rætt stuttlega um að tónlistarbransinn væri karlægur og að Katrína hefði lent í ýmsu á sínum ferli. Katrína segir í viðtalinu:
„Það hafa alveg einhverjir karlar beðið mann að fara úr að ofan á sviðinu eða það er verið að klípa í rassinn á manni eftir tónleika. Það er margt sem maður þurfti að brynja sig gagnvart. Maður gaf skít í þetta og fattaði ekki einu sinni strax að þetta væri ekki eðlilegt.“
Þegar viðtalið var birt á vef Morgunblaðsins varð fyrirsögnin „Beðin um að fara úr að ofan“ fyrir valinu. Sjálf lýsti Katrína vanþóknun sinni á fyrirsögninni á Facebook-síðu sinni. Frosti og Máni, stjórnendur Harmageddon fjölluðu um málið í útvarpsþætti sínum í gær. Þar sögðu Frosti og Máni að ekki væri gott að fórnarlambsvæða konur og Mammút hefði notið talsverðrar velgengni og komist áfram á sínum verðleikum.
Í þættinum var skoðun hennar á fyrirsögninni lesin upp en hún sagði:
„Það var margt sem ég hafði að segja um myndlistina og tónlistina en þetta er það sem blaðamönnum finnst áhugavert að draga fram. Ef við ætlum að ná einhverjum framförum í kynjabaráttu verðum við þá ekki að hætta að fórnarlambsvæða konur. Hvernig væri að setja fyrirsögn eins og:
„ROKKSTJARNA OG MYNDLISTARMAÐUR ÆTLAR SÉR AÐ SIGRA HEIMINN“
Fokk fjölmiðlar.“
Um þá fyrirsögn segir Jakob Bjarnar Grétarsson blaðamaður Vísis:
„Rokk og myndlistarmaður ætlar sér að sigra heizzzz ZZZ“