Segir sögu sína í þættinum Ný sýn í kvöld
„Þú getur alltaf hugsað: Af hverju ég? En þú ert líka einn af þeim heppnu sem lifði af og maður má ekki taka því sem litlum hlut,“ segir Karl Berndsen í þættinum Ný sýn í Sjónvarpi Símans. Þátturinn verður sýndur í opinni dagskrá í kvöld klukkan 20.
Í þættinum ræðir Karl meðal annars um alvarleg veikindi sem hann gekk í gegnum. Hann veiktist árið 2013 og var fyrst greindur með heilaæxli. Greiningunni var svo breytt og hann var sagður með vírus en skellurinn kom fyrir alvöru í byrjun árs 2014:
„15. febrúar dett ég út og sef til 23. apríl,“ segir hann í þættinum. Í ljós kom að hann var með offramleiðslu á heilavökva og greindist síðar með eitlakrabbamein.
Í tilkynningu frá Símanum vegna þáttarins í kvöld kemur fram að Karl segi frá því hvernig hann hafi óttast mest að verða blindur.
„Í upphafi var ekki vitað hvort ég yrði alveg blindur og þá eiginlega snerist allt líf mitt um það. Meiri hrylling gat ég ekki hugsað mér,“ segir Karl sem er lögblindur í dag – með undir 10% sjón. „Allt í einu vaknarðu. OK, svona er þetta, ætlar þú að hafa þetta svona eða ætlar þú að gera eitthvað í því.“ Hugarfar hans hafi í kjölfarði breyst: „Ég er ekki nema 52ja ára þannig að það hlýtur að vera helmingurinn eftir.“
Í þættinum kemur fram að líf Karls hefur breyst mikið frá því að hann veiktist. „Peningar sem ég hafði inn fyrir hádegi eru mánaðarlaunin í dag,“ segir hann frá. „En það er líf. Bara svolítið öðruvísi.“
Þátturinn með Karli Berndsen er þriðji í röð fimm þátta þar sem þekktir landsmenn, segja frá því hvernig þeir tókust á við erfiða lífreynslu. Söngkonan Svala Björgvins var í þeim fyrsta, svo Stefán Karl Stefánsson leikari og nú Karl. Skot Productions framleiðir þættina fyrir Símann.
Viðtalið við Karl verður í opinni dagskrá í Sjónvarpi Símans í kvöld, fimmtudags kl. 20. Þættirnir bíða einnig í efnisveitunni Sjónvarpi Símans Premium fyrir þá sem vilja horfa þegar hentar.
Um framtíðina segir Karl. „Einn daginn vakna ég og er fullur af framtíðarmöguleikum. Næsta dag vakna ég: Why bother.“ En lífið haldi áfram. „Þegar einar dyr lokast opnast aðrar. Ég hef trú á því.“
Karl sagði sögu sína í einlægu viðtali í helgarblaði DV í setepber síðastliðnum – viðtali sem vakti mikla athygli. Áhugasamir geta nálgast viðtalið hér í fullri lengd