Tíunda landsþing Landsbjargar fór fram síðastliðna helgi á Akureyri í bongóblíðu. Endaði dagskráin á glæsilegri árshátíð í íþróttahúsinu þar sem 600 manns skemmtu sér og slógu botn í vel heppnað landsþing. Veislustjóri var hinn geðþekki Logi Bergmann, sem fór á kostum í veislustjórninni og gerði grín að mönnum og málefnum eins og honum er einum lagið.
En snemma kvölds var ljóst að gríninu var snúið upp á Loga. Eins og margir vita þá er Logi með eindæmum hrekkjóttur maður og því ákvað einn félaga Landsbjargar að gestirnir myndu hrekkja hann all verulega. Sveinn Engilbert Óskarsson sem er félagi í Björgunarsveitinni Ísólfi á Seyðisfirði kom í ræðupúltið undir lok þingsins á laugardag, gaf fundargestum símanúmerið hans Loga og hvatti alla til að senda honum sms þegar hann myndi stíga á svið um kvöldið.
Og svo varð úr. Fljótlega eftir að Logi steig á svið byrjuðu viðstaddir að senda honum sms, sem voru af ýmsum toga, allt frá „Hæ Logi“ upp í stuttu ritgerðirnar. Þegar hann steig svo af sviði í fyrsta sinn reif hann upp símann og hló yfir þessum ósköpum. Las hann upp nokkur sms þegar hann steig næst á svið og dæmi eru um að hann hafi svarað einhverjum þeirra, en ekki er vitað hve mörgum. Enda tæki það líklega góðan tíma að svara rúmlega 300 smsum.