Hafdís og Hrönn yfirtaka Perform.is:
Hafdís Björg Kristjánsdóttir og Hrönn Sigurðardóttir eru sannkallaðar fitnessdrottningar og margfaldir meistarar í fitness. Nýlega tóku þær verslunina Perform.is yfir eina kvöldstund og veittu afslátt af öllum vörum. Fullt var út úr dyrum og hyggjast þær endurtaka leikinn.
„Við hlógum að því að búðin kemur bara út í mínus þegar við komum í heimsókn,“ segir Hafdís, en afsláttur á öllum vörum verslunarinnar var á bilinu 25–50% þegar þær stöllur tóku yfir. Fullt var út úr dyrum af ánægðum viðskiptavinum, margir þeirra verðlaunahafar í fitness og stefna þær á að endurtaka leikinn 1–2 sinnum á ári. „Við vorum með þetta í fyrsta sinn í fyrra og þá var það mjög vel sótt, núna var komin röð fyrir utan klukkan korter í sjö um kvöldið, en við opnuðum klukkan 20.“
Perform.is hefur styrkt Hafdísi og Hrönn fyrir mót og kaupa þær öll sín fæðubótarefni þar og því voru hæg heimatökin að sjá um búðina þetta eina kvöld.
Hafdís og Hrönn eru báðar margfaldir meistarar í fitness. Hafdís byrjaði að lyfta árið 2011 og er tvöfaldur Íslands- og bikarmeistari og komst áfram í tíu manna úrslit á Arnold Classic 2015 og 2016. Hrönn sem byrjaði að lyfta árið 2006 er einnig margfaldur meistari bæði í vaxtarrækt og fitness og náði þriðja sæti á Arnold Classic 2016. Hún æfir nú fyrir Arnold Classic í mars 2018.
„Ég er ólétt að mínu fjórða barni og á að eiga núna í október,“ segir Hafdís, sem heldur sér í formi með reglulegum æfingum, þótt hún sé ekki að æfa fyrir mót. „Ég stefni síðan á Arnold Classic í mars 2019.“
Hafdís og Hrönn eru báðar með Snapchat þar sem þær eru duglegar að snappa, bæði af æfingum og daglega lífinu; hafdisbk og hronnsig.
Ljósmyndir: Mummi Lú.