Einvala lið uppistandara mun níða skóinn hver af öðrum á Húrra
„Við gerðum þetta í fyrra þegar Hugleikur átti afmæli og það heppnaðist mjög vel. Við uppgötvuðum eitthvað sadó-masó í okkur og töluðum um að gera þetta aftur. Svo uppgötvaði ég að ég á þrítugsafmæli núna svo við slógum til,“ segir uppistandarinn Bylgja Babýlons sem á ekki von á góðu á skemmtistaðnum Húrra á laugardagskvöld þar sem hópur einvala grínista og uppistandara mun keppast við að grilla hver annan með gríni.
Um er að ræða svokallað „roast“ að erlendri fyrirmynd þar sem frægir grínistar koma saman og bókstaflega grilla hver annan, segja brandara á kostnað hver annars og þá einna helst heiðursgestsins hverju sinni. Það verður hlutskipti Bylgju að bera mestan þungann að þessu sinni.
„Það verður líklega mest níðst á mér,“ segir Bylgja sem kvíðir þó engu og lofar taumlausri skemmtun fyrir áhorfendur, þótt þeir grínistar sem þræddir verða upp á grillteininn á Húrra gætu átt von á neðanbeltishöggum.
„Við þekkjumst misvel en við sem þekkjumst gætum farið meira út í eitthvað persónulegra. Dregið einhverjar beinagrindur úr skápnum,“ segir Bylgja en auk hennar verða Hugleikur Dagsson, Jonathan Duffy, Saga Garðarsdóttir, Þorsteinn Guðmundsson, Þórdís Nadia Semichat, Jóhannes Ingi Torfason og Kamilla Einarsdóttir í grillveislunni.
Aðgangur er ókeypis og hefst Þrítugs-Róst Bylgju Babýlons klukkan 21 á laugardagskvöld.