Söngvarinn Tom Jones og Priscilla Presley hafa sést mikið saman að undanförnu. Slúðurblöð hafa birt fréttir þess efnis að þau séu par en söngvarinn segir að svo sé ekki, þau séu gamlir og góðir vinir.

Söngvarinn, sem er 76 ára, missti eiginkonu sína, Lindu, úr krabbameini í fyrra en þau höfðu verið gift í 59 ár. Priscilla er 71 árs og var gift Elvis Presley á árunum 1967–1973 og þá kynntust þau Tom vel, en þeir Elvis voru góðir vinir. Priscilla er sögð hafa verið stoð og stytta Tom Jones eftir lát eiginkonu hans. Söngvarinn tók dauða Lindu afar nærri sér og í viðtölum hefur hann sagt að hann heyri stundum rödd hennar og sjái hana um nætur. Það erfiðasta sé að dreyma hana og vakna síðan og komast að raun um að hún sé ekki þarna.

Sögur um ástarsamband Toms og Priscillu eru háværar en á dögunum var tekin af þeim mynd þar sem hann hélt utan um hana. Haft er eftir Tom að hann sé ekki alveg viss um að Elvis væri ánægður með það hversu miklum tíma þau Priscilla verja saman.