Stefán Blackburn og Stefán Logi Sívarsson, sem báðir hafa verið dæmdir fyrir hrottalega glæpi, skipuðu byrjunarlið fótboltafélagsins Kórdrengir sem lék sinn fyrsta leik í Borgunarbikar karla 23. apríl síðastliðinn.
Liðið tapaði gegn Reyni S. 7-1 og er því úr leik í mótinu. Nafnarnir höguðu sér vel inn á vellinum og fengu enga áminningu. Næsti leikur Kórdrengjanna verður gegn Snæfelli/UDN í fjórðu deild karla.
Báðir voru þeir dæmdir í sex ára fangelsi fyrir hrottalega líkamsárás og frelsissviptingu í Stokkseyrarmálinu svokallaða árið 2014. Fórnarlamb í málinu lýsti því fyrir dómi að kveikt hefði verið í kynfærum hans og slökkt í sígarettu á andliti hans.
Fleiri úr liði Kórdrengja hafa komist í kast við lögin, Þannig var formaður félagsins, Logi Már Hermannsson, dæmdur í þriggja ára og níu mánaða fangelsi fyrir fíkniefnainnflutning árið 2010.
Varaformaður félagsins, Davíð Smári Helenarson, einnig þekktur sem Dabbi Grensás, hefur einnig hlotið refsidóma fyrir líkamsárásir en hann þótti liðtækur markvörður á sínum yngri árum.