Sylvester Stallone veit manna best að hundurinn er besti vinur mannsins. Stallone rifjaði á dögunum upp vinátta sína og hundsins Butkas. Stallone segir að hugmyndin að handritinu að Rocky hafi komið frá hvolpinum og þakkar honum velgengni sína, en útskýrir það ekki nánar.
Árið 1971 þegar leikarinn var að reyna að fóta sig í Hollywood bjó hann í niðurníddu gistihúsi fyrir ofan skyndibitastað með hvolpinum Butkas. „Við vorum báðir magrir og svangir og höfðum ekki mikið annað að gera en að eyða tíma hvor með öðrum.“ Nokkrum árum síðar var fjárhagur Stallone orðinn en verri og hann brá á það ráð að selja hund sinn fyrir 40 dollara til að eiga fyrir mat. Skyndilega birti til því United Artists keypti handritið að Rocky sem Stallone hafði skrifað á þremur dögum. Eitt fyrsta verk Stallone var að kaupa aftur hund sinn, en eigandi sem vissi að Stallone myndi borga nánast hvað sem er til að fá Butkas aftur krafðist 15.000 dala greiðslu fyrir hundinn. „Hann var hvers eyris virði,“ segir Stallone sem endurheimti Butkas.
Butkas brá fyrir í Rocky I og Rocky II. Hann kvaddi þennan heim árið 1981 eftir að hafa fengið hjartaáfall.