Á Facebook hefur apríl verið tileinkaður ljóðlistinni á síðu sem heitir einfaldlega Ljóðapríl 2017. Þar hefur fjöldi einstaklinga deilt sínum uppáhaldsljóðum og nokkrir deilt ljóðum sem þeir sjálfir hafa ort. Í síðarnefnda hópnum eru meðal annarra tveir ungir feður, sem báðir eiga fjölda ljóða í skúffu sem eru óðum að koma upp á yfirborðið og fyrir augu almennings.
Í nótt mig drauminn dreymdi,
dýrðar stund var það.
Og söknuð, grát ég gleymdi,
fann gleði´á þessum stað.
Þú til mín komst og kysstir,
komst með brosið þitt.
Og sagðir mér, þú misstir,
molnað hjarta mitt.
En núna varstu vinan,
viss um okkar ást.
Ég fann minn yl að innan,
allur hætti´að þjást.
Við lágum tvö í leyni,
litla fagra stund.
Fann líkn á mínu meini ,
er mætti’á þennan fund.
En aftur var svo vaknað,
veröld blasti við.
Þín var aftur saknað,
svo aftur hófst mín bið.
Höfundur: Svanur Bjarki Úlfarsson (37), einstæður tveggja barna faðir, tónmenntakennari í Kelduskóla og meðlimur í dúettinum Dúbilló.
Minn tilgangur í lífi hér
nærir alla daga mína
hjörtun þrjú í hjarta mér
mér fegurðina sýna
Það sem Sölvi sýndi mér
er hann kom í heiminn
að risa hjarta ég í brjósti ber
hann lýsti upp himingeiminn
Mitt blóð í æðum Adríans er
hann er kraftur minn og styrkur
er hönd hans læðist um háls á mér
hverfur allt mitt myrkur
Lindin er mitt lífsins blóm
hún nærir hjartarætur.
af ást hún fyllti augun tóm
hún er ljós um dimmar nætur
Allt sem ég á það gef ég þeim
ekkert er of mikið
þau færa ást inn í þennan heim
og gleði fyrir vikið.
Sölvi Snær, Adrían Elí og Indía Lind.
Höfundur: Mikael Tamar Elíasson (30 ára), einstæður þriggja barna faðir og sjómaður.