Var að kaupa sér bjór með kortinu hennar
Berglind „Festival“ Pétursdóttir, sem fer á kostum í Vikunni með Gísla Marteini á föstudagskvöldum á RÚV lenti í því leiðindaatviki að úlpunni hennar var stolið á skemmtistað í Reykjavík um helgina.
Berglind var þó heppin því hún fann þjófinn aftur. Þá stóð hann, klæddur í úlpuna að reyna að kaupa sér bjór á barnum með kortinu hennar. Að sögn Berglindar var maðurinn í mjög annarlegu ástandi. Hún náði að stöðva bjórkaup úlpuþjófsins og bað viðkomandi um að hunskast úr úlpunni.
Vinir hins sauðdrukkna manns vildu ólmir bæta Berglindi óþægindin með bjór á barnum, en að sögn Berglindar létu þeir sig hverfa af vettvangi áður en til þess kom.