Þrír breskir drengir, Prince, Aires og Jermaine, hafa vakið athygli hérlendis með skemmtilegum myndböndum á Youtube. Þeir kalla sig Kuzo-hópinn og í myndböndunum hlusta þeir á vinsæl íslensk lög og leggja dóm sinn á þau. Þeir skilja að sjálfsögðu ekki orð í neinu einasta lagi en það skemmir greinilega ekki fyrir upplifun þeirra sem er afar hressandi. Í athugasemdum má sjá að fjölmargir Íslendingar fylgjast vel með piltunum og senda þeim ábendingar um önnur lög sem þeir þurfa að hlýða á.

Áhugi þeirra á íslenskri tónlist sprettur ekki upp úr engu. Fram kemur í einu myndbandinu að Prince hafi búið í 5 mánuði á Íslandi árið 2016 og fer lofsamlegum orðum um land og þjóð. „Ef að þið hafið ekki farið til Ísland þá verðið þið að drífa ykkur, þetta er ótrúlegt land,“ segir Prince og leggur þar með sitt lóð á vog íslenskrar ferðaþjónustu.

Lög sem að félagarnir hafa dæmt eru „NeiNei“ með Áttunni, „Fullir vasar“ með Aroni Can, „Time“ með Sturla Atlas „Skilfurskotta“ og „Þetta má“ með Emmsjé Gauta, sem er í sérstöku uppáhaldi hjá þremenningunum.

Heilt yfir eru þremenningarnir afar ánægðir með íslenska tónlistarmenn. „Þið eruð hæfileikarík. Ég elska þetta lag,“ segir Prince meðal annars og dillar sér af innlifun við lag Áttunnar.

Hér má sjá nokkur myndbönd Kuzo-piltanna.

NEINEI – Áttan

[youtube https://www.youtube.com/watch?v=wzwVEq6IOwM&w=560&h=315]

Þetta má ft. Herra Hnetusmjör – Emmsjé Gauti

[youtube https://www.youtube.com/watch?v=tS5EtEtZxFs&w=560&h=315]

Enginn Mórall/Grunaður – Aron Can

[youtube https://www.youtube.com/watch?v=bw2ptxCK_2A&w=560&h=315]