Þórarinn Ævarsson, framkvæmdastjóri IKEA, er í viðtali í helgarblaði DV. Þar ræðir hann meðal annars um föður sinn, Ævar Jóhannsson, hugsjónamann sem var á undan sínum tíma. Ævar fann meðal annars upp aðferð sem notuð er í heiminum í dag við að framkalla lit og fékk fyrir henni einkaleyfi sem hann missti að lokum. Hann fann einnig upp tæki sem heitir íssjáin og er notuð til að mæla þykkt á jöklum. Ævar, sem er 86 ára gamall, er landsþekktur fyrir lúpínuseyði sitt.
Í viðtalinu segir Þórarinn frá því hvernig faðir hans fékk hugmyndina að lúpínuseyðinu. „Hann dreymdi mjög skýran draum þar sem maður kom til hans og sagði honum að taka tilteknar jurtir og sjóða saman í ákveðinn tíma. Það myndi gera gagn. Vinur pabba var með krabbamein á lokastigi og það var ákveðið að prófa seyðið á honum. Hann var að deyja en eins og hendi væri veifað hvarf krabbameinið,“ segir Þórarinn. „Þetta var byrjunin. Eitt leiddi af öðru og æ fleiri fóru að drekka seyðið. Seyðið virtist styrkja ofnæmiskerfið og fólki fannst því líða betur. Pabbi gaf alltaf seyðið, þáði ekki krónu fyrir, þetta var hugsjónastarf.“
Þórarinn varð vitanlega var við hversu mikill áhugi almennings var á seyðinu. Alla mína æsku hringdi síminn stöðugt og á öllum tímum dags hringdi dyrabjallan, meira að segja á aðfangadag. Pabbi talaði við hvern einasta mann. Hann hélt mikið bókhald um þetta fólk til að fylgjast með hvernig því reiddi af. Enn er á lífi fólk sem þakkar honum fyrir að hafa bætt líf sitt eða nákominna.“
