Ólíkt flestum finnst Emilíu barneignir mun stærri skuldbinding en hjónaband
„Ha? Gifta ykkur? En þið eigið allt lífið eftir.” Þetta voru viðbrögð vina og ættingja Emilíu Bjargar Óskarsdóttur þegar hún tilkynnti að hún ætlaði að gifta sig árið 2007, þá 22 ára gömul. Ólíkt flestum Íslendingum af þúsaldarkynslóðinni svokölluðu finnst Emilíu mun stærri skuldbinding að eignast barn en að ganga í hjónaband.
Emilía, sem einhverjir ættu að kannast við frá því að hún var meðlimur í stúlknahljómsveitinni Nylon, og Pálmi Sigurðsson gengu í hjónaband sumarið 2007. Emilía var þá 22 ára og Pálmi 26 ára.
Á bloggsíðu sinni á Króm segir Emilía frá því að á þessum tíma hafi þau verið búin að vera saman í 4 ár og handviss um að þau vildu eyða lífinu saman. Þá hafði Emilía, sem er 32 ára í dag, alltaf séð fyrir sér að verða ung brúður.
„Svo er ég líka mjög skipulögð og því var þetta allt saman í „réttri“ röð,“ segir Emilía í bloggfærslunni en fyrir henni er rétta röðin að búa fyrst saman, gifta sig og eignast börn eftir það.
Emilía kveðst lítinn sem engan skilning hafa haft á þessum athugasemdum fólks sem fussaði yfir því að þau ætluðu að gifta sig svona ung:
„Fyrir mér er mun stærra skref að eignast barn með einhverjum heldur en hjónaband – en það virðist „sjálfsagðara“ að fólk eignist börn upp úr tvítugu en hjónaband, Guð forði ykkur frá því. Það að vilja játa ást okkar fyrir Guði og mönnum var á engan hátt að fara að skerða okkar möguleika í lífinu, þvert á móti.“
Nú eru liðin 14 ár síðan Emilía og Pálmi kynntust og þau eiga 10 ára brúðkaupsafmæli í sumar. Frá því að þau giftu sig eru þau búin að eignast tvær dætur og Emilía kveðst ekki geta hugsað sér lífið án hans.
„Hann stendur alltaf við bakið á mér sama hvað, er minn allra besti vinur og er alltaf til staðar. Hann er besti pabbi sem dætur mínar og stjúpdóttir gætu átt.“